Հանրայինի ամերիկյան մասնաճյուղը մինչ օրս նախարար Սիմիդյանի քրոջ «տնվորն» է․ «Հետք»

Հայաստանի հանրային հեռուստաընկերության ամերիկյան դուստր ընկերությունը՝ First Channel America-ն (թարգմանաբար՝ «Առաջին ալիք Ամերիկա»), հիմնադրումից մեկ տարի անց էլ շարունակում է «տնավորված մնալ» Արաքսի Սիմիդյանի առանձնատանը, որն ընկերության գործադիր ու ֆինանսական ղեկավարն է, ինչպես նաև քարտուղարը: Այս մասին գրում է «Հետք»-ը։

Ա. Սիմիդյանը կլինիկական հոգեբան է և մինչև Հանրայինի ամերիկյան մասնաճյուղի ղեկավար դառնալը որևէ կապ չի ունեցել մեդիաոլորտի հետ: Փոխարենը նա ՀՀ շրջակա միջավայրի նախարար Հակոբ Սիմիդյանի հարազատ քույրն է: Ավելին՝ Սիմիդյանները բավականին մոտ հարաբերություններ ունեն վարչապետ Փաշինյանի ընտանիքի հետ:

Նախարար Սիմիդյանի քույրը 2009 թվականից ԱՄՆ քաղաքացի է:

Մինչև վերջերս նրա տան հասցեում էր գրանցված նաև վարչապետի տիկին Աննա Հակոբյանի ղեկավարած «Իմ քայլը» հիմնադրամի ամերիկյան մասնաճյուղը: Արաքսի Սիմիդյանն այս հիմնադրամի հոգաբարձուների խորհրդի անդամ է, ինչպես նաև ամերիկյան մասնաճյուղի (My Step Foundation Inc.) ֆինանսական ղեկավարն ու քարտուղարը:

Երբ անցյալ տարի Հանրային հեռարձակողի խորհրդի (նախկինում՝ Հանրային հեռուստառադիոընկերության խորհուրդ, սա «Հայաստանի հանրային հեռուստաընկերություն» և «Հայաստանի հանրային ռադիոընկերություն» ՓԲԸ-ների կառավարումն ապահովող և հսկողություն իրականացնող մարմինն է) նախագահ Արա Շիրինյանին հարցրել էինք, թե արդյոք էթիկապես ճիշտ է, որ հանրային շահը սպասարկելու կոչված լրատվամիջոցի ղեկավարը լինի ՀՀ իշխող կուսակցությանը փոխկապակցված անձ, իսկ ընկերությունը գրանցված լինի այդ անձի տանը, որտեղ որ գրանցված է նաև իշխող կուսակցությանն առնչվող հիմնադրամը, Շիրինյանն ասել էր. «Մինչև ընկերության գործունեության ամբողջական մեկնարկը ԱՄՆ օրենսդրությամբ հարկավոր է, որ ընկերությունը գրանցվի որևէ հասցեում: Այդ իսկ պատճառով First Channel America-ն ժամանակավորապես գրանցված է տվյալ հասցեում»:

Չնայած Շիրինյանը չէր հստակեցրել, թե երբ է նախատեսվում Հանրային ամերիկյան մասնաճյուղի ամբողջական մեկնարկը, և որքան է այդ «ժամանակավորապես»-ը, ենթադրելի էր, որ խոսքը մի քանի ամսվա մասին է:

Շարունակությունը՝ սկզբնաղբյուր կայքում։