ՔՊ-ի հերթական «լավությունը»․ ինչու են աղբահանության տուգանքները ներում

Երևանի քաղաքապետարանի՝ մայիսի 19-ի գործակարգավարական խորհրդակցության ժամանակ զեկուցվեց, որ ամբողջ ծավալով գործարկվել է աղբահանության վճար վճարողների հաշվառման նոր համակարգը, որին արդեն ինտեգրվել են մի քանի վճարահաշվարկային կազմակերպություններ:

Տիգրան Ավինյանը խոսեց նաև աղբահանության տույժ-տուգանքներից՝ տեղեկացնելով, որ ավագանու նիստին արտոնությունների մասին մի նախագիծ կնեկայացվի, որը ենթադրում է նախընթաց ամսիներին բոլոր տույժ-տուգանքներից ազատում:

Oragir.News-ը թեմայի վերաբերյալ մեկնաբանություն ստանալու նպատակով զրուցեց «Մայր Հայաստան» խմբակցություն ղեկավար Մանուկ Սուքիասյանի հետ։

«Ըստ պաշտոնական պատասխանի՝ վճարումներ ընդունող էլեկտրոնային համակարգը պատրաստ չի եղել։ Ինչպես միշտ, սայլը բերել, ձիուց առաջ են դրել։ Փոխանակ համակարգը սարքեն, հետո փոփոխություններ մտցնեն, իրենք արել են հակառակը։ Քանի որ խնդիր է դրված եղել՝ ամեն գնով ավելի գումար հավաքագրել, դրա համար արագ որոշում են կայացրել, հետո նոր սկսել են մտածել դրա մեխանիզմները ստեղծելու մասին»,-ասաց նա։

Սուքիասյանի խոսքով՝ սա հերթական իմիտացիան է։

«Ըստ իրենց «տրամաբանության»՝ լավություն են արել։ Սա հերթական ցինիզմ է և իմիտացիան»,-եզրափակեց «Մայր Հայաստան» ընդդիմադիր խմբակցության ղեկավարը։