Լեռնային Ղարաբաղի պատկանելության հարցը դիտավորյալ դուրս մնաց նոյեմբերի 9-ի փաստաթղթից․ Լավրով

«Չգիտեմ, թե դուք ինչն եք համարում համապատասխան արձագանք։ Հատկապես ՀԱՊԿ-ի շրջանակներում Հայաստանի նկատմամբ մեր պարտավորություններին համապատասխանող արձագանքը, այդ արձագանքը հաջորդել է»,- մայիսի 21-ին Երևանում կայացած մամուլի ասուլիսում ասաց ՌԴ արտաքին գործերի նախարար Սերգեյ Լավրովը՝ պատասխանելով հարցին, թե երբ 2022 թվականին Ադրբեջանը հարձակվեց Հայաստանի ինքնիշխան տարածքի՝ Ջերմուկ քաղաքի վրա, ինչո՞ւ Ռուսաստանի Դաշնության համապատասխան արձագանք չեղավ։

Նրա խոսքով՝ ՀԱՊԿ-ի առաջնագծի առաքելությունը՝ գլխավոր քարտուղարի գլխավորությամբ, անմիջապես մեկնել է դեպքի վայր և անհապաղ ներկայացրել զեկույց՝ իրավիճակի կայունացման նպատակով ՀԱՊԿ դիտորդական առաքելություն ուղարկելու վերաբերյալ կոնկրետ և գործնական առաջարկներով։

«Դիտորդների թիվը և նրանց ունեցած զենքը նախատեսված էին։ Եվ այս զեկույցը քննարկվել է նույն թվականի հոկտեմբերին՝ ՀԱՊԿ-ի երևանյան գագաթնաժողովի շրջանակներում։ Պետությունների և կառավարությունների ղեկավարների հանդիպման նախօրեին աշխատել են արտաքին գործերի և պաշտպանության նախարարները։ Մենք երկար ժամանակ աշխատել ենք՝ խմբագրելով Արարատ Միրզոյանի նախագահությամբ ՀԱՊԿ քարտուղարության կողմից ներկայացված առաջարկները։ Արդյունքում մենք համաձայնության եկանք ամբողջ տեքստի շուրջ, և տեքստը առավոտյան ներկայացվեց պետությունների և կառավարությունների ղեկավարների քննարկմանը։ Սակայն այդ իրավիճակում, տարբեր պատճառներով, հայկական կողմը առաջարկեց հետաձգել արդեն համաձայնեցված տեքստը։ Կոնսենսուս չկար և մենք համաձայնեցինք», — ասաց Լավրովը։

Նա հիշեցրեց, որ արդեն 2022 թվականի նոյեմբերին հայտարարվեց ԵՄ առաքելության մասին։

«Իսկ Պրահայում հայտարարվեց, որ Լեռնային Ղարաբաղի պատկանելության վերաբերյալ դիրքորոշումն արդեն փոխադարձ հիմունքներով է, ինչը հաստատել են և՛ Բաքուն, և՛ Երևանը, և կորոշվի 1991 թվականի Ալմա-Աթայի հռչակագրի հիման վրա, որի համաձայն՝ ԼՂԻՄ-ը Ադրբեջանի մաս է կազմում»,-հայտարարեց լավրովը և հավելեց. «Սա բավականին անսպասելի էր, քանի որ 2020 թվականի նոյեմբերին, երբ Ադրբեջանի և Հայաստանի միջև ռազմական գործողությունների գագաթնակետին Ռուսաստանի Դաշնության նախագահը, Հայաստանի վարչապետի և Ադրբեջանի նախագահի հետ միասին, գիշերը բառացիորեն խմբագրեց հրադադարի համաձայնագիրը, Լեռնային Ղարաբաղի պատկանելության հարցը դիտավորյալ դուրս մնաց այդ փաստաթղթից։ Այն ջենտլմենական համաձայնություն էր, որ Լեռնային Ղարաբաղի կարգավիճակը պետք է լինի կողմերի միջև հետագա համաձայնեցման առարկան», -հավելեց Լավրովը։

Մանրամասն՝ տեսանյութում։