Անպատասխան չենք թողնում, բայց թաքուն հանցավոր բաներով էլ չենք զբաղվելու. Սամվել Հակոբյան

«Հրապարակը» գրում է. «Երեւանի ավագանու «Մայր Հայաստան» խմբակցությունը վերջին օրերին հանրության ուշադրության կենտրոնում է հայտնվել։ Այս խմբակցությունը Երեւանի քաղաքապետարանում ամենաակտիվն է, քաղաքապետարանի անգործությունն է վերհանում, բացահայտում է կոռուպցիան, քայլում մայրաքաղաքի փողոցներով, ուղիղ եթերներ մտնում, քաղաքացիների խնդիրներին ծանոթանում եւ այլն։ Խմբակցության բոլորն անդամներն ակտիվ են, ամեն մեկը մի գործառույթ իրականացնում է, եւ պայմանավորված դրանով՝ սկսել են նրանց թիրախավորել, հաշվեհարդար տեսնել, հակադարձել։

Մոտ մեկ շաբաթ առաջ մեղադրանք առաջադրվեց «Մայր Հայաստանի» անդամ Մեսրոպ Մանուկյանին՝ խուլիգանության հոդվածով։ Բլոգեր Արթուր Չախոյանն ու ավագանու անդամ Մեսրոպ Մանուկյանը համատեղ տեսանյութ էին հրապարակել Նոր Նորքի նոր վերանորոգված թիվ 105 մանկապարտեզից՝ ցույց տալով կատարված անորակ աշխատանքները։ Դրանից հետո Չախոյանը գրառում էր արել, որ Նոր Նորք վարչական շրջանի ղեկավարը զանգահարել է իրեն ու Մանուկյանին, սպառնացել եւ սեռական հայհոյանքներ տվել։ Հաջորդ օրը թաղապետարանի շենքի մոտ Չախոյանն ու Մանուկյանը բողոքի ակցիա էին իրականացրել՝ հրապարակելով հեռախոսազանգի ձայնագրությունը, որտեղ նախ թաղապետը հայհոյում է, ապա փոխադարձ հայհոյանքներ են հնչում։ Ակցիայի կազմակերպիչները յոգուրտ էին լցրել թաղապետի լուսանկարների վրա, որոնք իրենց հետ էին տարել` ի պատասխան նրա հայհոյանքի: Իրավապահներն այս արարքը դիտարկել են որպես խուլիգանություն, մինչդեռ այդ ակցիայից հետո բռունցքներով բլոգերին ծեծած Նոր Նորքի թաղապետ Տիգրան Տեր-Մարգարյանի նկատմամբ միջին ծանրության մի հոդված են դրել՝ «ֆիզիկական ներգործություն», նրա նկատմամբ խափանման միջոց չեն կիրառել եւ անգամ թույլատրել են շարունակել պաշտոնավարումը։ Քաղաքապետարանի գործակարգավարական խորհրդակցությունում վարչական շրջանի ղեկավարն ընդամենը ներողություն խնդրեց հանրությունից եւ ասաց, որ պետք է ավելի զուսպ լիներ: Քրգործի ճակատագիրը պարզ է․ այն կքննվի, կա՛մ մինչեւ դատարան գնալը «կջրվի», կա՛մ` դատարանում, եւ ամեն ինչ կավարտվի։
Սակայն «Մայր Հայաստանի» եւ իրենց դեմ դուրս եկած գործիչների նկատմամբ իշխանությունը չի պատրաստվում հարուցված քրգործով բավարարվել` 2 օր առաջ այրել էին խմբակցության անդամ Գեւորգ Ստեփանյանի կնոջ մեքենան։

Ստեփանյանը, «Հրապարակ»-ի հետ զրույցում անդրադառնալով դեպքին, ասել էր․ «Քաղաքական հայացքների համար է, այլ կասկածներ չկան։ Ես որեւէ մեկի հետ անձնական խնդիրներ չեմ ունեցել։ Իմ տունը սեփական տուն է, 7 տարի է՝ սարքել եմ, իմ տան դուռը 7 տարի է՝ բաց է, անգամ բանալիով չի փակվել, եթե որեւէ մեկի հետ նախկինում խնդիր ունեցած լինեի, արդեն հաշվեհարդար տեսած կլինեին»։ Ստեփանյանը նաեւ չէր բացառել, որ սա կարող է Նոր Նորքի թաղապետարանում թաղապետի մասնակցությամբ տեղի ունեցած ծեծկռտուքի շարունակությունը լինել։ «Իհարկե՝ չեմ բացառում, սրանցից ամեն ինչ սպասելի է։ Փաստորեն, ով դուրս է գալիս ՔՊ-ի դեմ, բացահայտում կոռուպցիան, նրա հետ այսպես են վարվում, քաղաքական հաշվեհարդար են տեսնում»։ 

Երեւանի քաղաքապետարանում եւս մեկ ընդդիմադիր խմբակցություն կա՝ նախկին քաղաքապետ Հայկ Մարությանի «Ազգային առաջընթաց»-ը, որի անդամները լուռ են, գրեթե չեն երեւում, տեղի ունեցածի վերաբերյալ միայն հատուկենտ ստատուսներ են գրել՝ թաղապետի մասնակցությամբ ծեծկռտուքը դատապարտող։ Նրանք տրանսպորտի թանկացման դեմ պայքարը սկսեցին ու լռեցին: Խմբակցության ղեկավար Հայկ Գրիգորյանը մեր հարցին, թե ինչու են լռում թաղապետարանում տեղի ունեցած դեպքի վերաբերյալ, ասաց՝ ինքը դրա մասին գրառմամբ է հանդես եկել, ապա անդրադառնալով Գ․ Ստեփանյանի կնոջ մեքենան այրելուն՝ ասաց․ «Ցանկացած դեպքում, եթե դրա հետ է կապված, ցանկացած խոչընդոտում գործունեությանը, դատապարտում ենք՝ դա լինի բռնության խոսք, թե իր ընտանիքի անդամներին ահաբեկելու փորձ»։

«Մայր Հայաստանից» Սամվել Հակոբյանից էլ հետաքրքրվեցինք՝ այս դեպքերից հետո ի՞նչ են պատրաստվում անել։ «Այո, անպատժելիություն կա, եւ դա է, որ Գեւորգի տիկնոջ մեքենան այրեցին, չունեմ տեղեկություն՝ ով է։ Սա «Մայր Հայաստանի», մասնավորապես Գեւորգի ընդդիմադիր կեցվածքի եւ շարունակական աշխատանքի հետ է կապված։ Հարցին, թե ինչ ենք պատրաստվում անել, բնականաբար, չեմ կարող ասել, որ մենք պատրաստվում ենք իրենց մեքենաներն այրել կամ 10 հոգով բռնենք` իրենց ծեծենք, մեզ վրա տեղում եկող հարձակումները՝ ֆիզիկական կամ բանավոր, անպատասխան չենք թողնում, բայց թաքուն հանցավոր բաներով էլ չենք զբաղվելու։ Մենք շարունակելու ենք մեր գործը՝ բացահայտելու ենք այս մարդկանց իրական դեմքը, իրենց անգրագիտությունը, անկշտությունը, պարզապես շարունակելու ենք աշխատել»։