Սահմանադրություն՝ Ալիևի խմբագրությամբ

Նիկոլ Փաշինյանի արդարադատության նախարարը օրերս հայտարարեց, որ նոր Սահմանադրության նախագիծը պատրաստ կլինի մոտավորապես 10 ամսվա ընթացքում։ Թեև այս հայտարարությունն առաջին հայացքից կարող է ընկալվել որպես ներքաղաքական օրակարգի բաղադրիչ, իրականում այն ավելի խորքային և մտահոգիչ ենթատեքստ ունի։

Փաստացի,10 ամիս ժամանակ է տվել Իլհամ Ալիևը Փաշինյանին ու նրա թիմին՝ Բաքվի համար ընդունելի Սահմանադրություն մշակելու համար։ Չի բացառվում, որ Ալիևին անհանգստացնող դրույթները հենց Բաքվում խմբագրվեն և թելադրվեն Հայաստանի իշխանություններին։

Այս համատեքստում մենք գործ ունենք ոչ թե ինքնուրույն մշակվող սահմանադրական նախագծի, այլ փաստացի՝ Ալիևի խմբագրած Սահմանադրության հետ։ Քաղաքացիական պայմանագիր կուսակցության ներկայացուցիչներն այնքան «ինքնիշխան» են դարձել, որ այսօր Հայաստանի Հանրապետության Սահմանադրությունը խմբագրվում է այլ պետության ղեկավարի հրահանգներով։

Հիշեցնենք՝ սահմանադրական փոփոխությունների անհրաժեշտության մասին առաջինը խոսեց հենց Իլհամ Ալիևը՝ 2021 թվականին։ Դրան նախորդած ժամանակահատվածում Փաշինյանը որևէ դժգոհություն չէր հայտնել գործող Սահմանադրության վերաբերյալ՝ այն բավականին հարմարեցված էր իր քաղաքական նպատակներին։

Եթե Նիկոլ Փաշինյանը հասցնի իրականացնել Ալիևի պահանջն ու Հայաստանում կյանքի կոչի Բաքվում մշակված Սահմանադրությունը, ապա դա դա կնշանակի Հայաստանի Հանրապետության լուծարում։

«Մայր Հայաստան» դաշինքի անդամ Դերենիկ Մալխասյանի ֆեյսբուքյան էջից