Մեր համոզմամբ, գյումրեցիները չեն փոշմանելու, որ տվել են այդ 2 մանդատը «Մայր Հայաստանին», որովհետեւ տեսնելու են մաքսիմալ աշխատանք. Կարեն Սիմոնյան

Ապրիլի 4-ին «Մեր քաղաքը» դաշինքի թեկնածու Մարտուն Գրիգորյանը վերջապես հրապարակեց իր որոշումը՝ հայտարարելով, որ սատարելու է ընդդիմության թեկնածուին: «Հրապարակը» մի քանի հարց ուղղեց «Մայր Հայաստան» դաշինքի քաղաքապետի թեկնածու Կարեն Սիմոնյանին: 

- Մարտուն Գրիգորյանը հայտարարություն արեց՝ ուշացա՞ծ էր, թե՞ ոչ։ Ձեր մասով կային մտքեր, որ շտապել եք, ճիշտ կլիներ՝ քննարկեիք, նոր սատարող հայտարարություններ անեիք` հօգուտ Վարդան Ղուկասյանի։ Ի՞նչ կասեք այս առումով:

- Նախ, շատ ուրախ եմ, որ «Քաղաքացիական պայմանագիրը» պետք է իշխանազրկվի Գյումրիում: Մնացած մասով՝ շտապողականության, թե ավելի շատ քննարկում էր պետք, կարող եմ ասել, որ խոսքին տեր լինելը 10 օր առաջ, թե 10 օր հետո` տարբերություն չկա:

Ինչ մնում է պատասխանատվությանը․ մենք պատասխանատու ենք մեզ, մեր 2 մանդատի համար, դրանցով կատարվող գործողությունների համար եւ 100 տոկոսով պատասխան ենք տալիս, խնդիր չունենք: Մեր համոզմամբ, գյումրեցիները չեն փոշմանելու, որ տվել են այդ 2 մանդատը, որովհետեւ տեսնելու են մաքսիմալ աշխատանք, մաքսիմալ արդյունավետություն, քաղաքի ծրագրերի առաջքաշում, քաղաքացիների խնդիրներով զբաղվելն են տեսնելու, եւ նաեւ մյուս քաղաքացիներն էլ փոշմանելու են, որ ձայները չեն տվել մեզ, մեր ուժին, մեր թիմին, որովհետեւ մեր պատկերացրած ավագանու աշխատանքը, կարեւոր չի՝ 2 հոգով է, թե 12 հոգով, հաստատ գոհացնելու է մեր գյումրեցիներին․ այս մասով մենք 100 տոկոս պատասխանատվություն կրում ենք: Մնացածի համար, ցանկացած ադեկվատ մարդ հասկանում է, որ դու չես կարող պատասխան տալ որեւէ այլ քաղաքական ուժի եւ այլ անձի գործողությունների համար: Իսկ մեր մանդատները, վստահեցնում եմ, ծառայելու են Գյումրի քաղաքին: 

- Մարտուն Գրիգորյանն իր հայտարարության մեջ նախազգուշացնում է, որ քրեական գործերով պայմանավորված՝ ամենախոցելի թեկնածուն քաղաքապետ է դառնում, ու այստեղ կա ռիսկ: Դուք համամի՞տ եք, սա ենթադրո՞ւմ է, որ քաղաքապետի հետ շատ զգույշ եք աշխատելու: 

- Մենք գնում ենք մաքսիմալ լավ աշխատելու, մենք գնում ենք քաղաքի ծրագրերով, քաղաքին առավել օգուտ բերելու ճանապարհով, մնացածն ինքն է որոշելու, թե ոնց աշխատի: 

- ՏԻՄ եւ պետական մարմինների հարաբերակցությունն այնպիսին է, որ Գյումրին որոշակի կախվածություն ունենալու է Երեւանից: Ի՞նչ կանեք, եթե կառավարությունը խոչընդոտի ընդդիմադիր, ոչ ՔՊ-ական Գյումրու զարգացմանը: Այսպիսի սցենար ակնկալո՞ւմ եք: 

- Կխոչընդոտի՝ համապատասխան գնահատականի կարժանանա մեր կողմից, կխոչընդոտի՝ պատասխան կստանա մեր կողմից, եւ գյումրեցիներն անպայման հետեւություն կանեն, թե կառավարությունը, ի վերջո, Հայաստանի Հանրապետության կառավարությո՞ւնն է, թե՞ միայն «Քաղաքացիական պայմանագրի»:

- Ձեր թիմակիցների, Ձեր դեմ վարույթներ էին նախաձեռնել, ինչ-որ նորություն կա՞: 

- Ամբողջությամբ փուչ, շինծու վարույթ է: Փորձեցին մեր վերջին օրվա հավաքը խափանել, բայց հաշվի չառան, որ մենք ունենք պրոֆեսիոնալիզմ, մեկ անձից կախված չենք, յուրաքանչյուրն իր գործին լավ է տիրապետում, եւ մի քանի ժամ հետո ցույց տվեցինք, որ ե՛ւ մեր հավաքը կայացավ, ե՛ւ մեր շտաբի աշխատանքը շարունակվեց: Ինչքան էլ փորձեցին լղոզել քարոզարշավի վերջին 2-3 օրը, էլ գումարներ ծախսելով, պլակատներ զակազ տալով, մամուլներ բացելով, գովազդի տակ դնել, աշխատացնելով, չանցավ, որովհետեւ գյումրեցին գիտի, որ մենք մեր թիմով պատրաստակամ ենք աշխատելու Գյումրու օգտին: 

- Փաստորեն, որոշվեց քաղաքի ճակատագիրը, Դուք Գյումրիում եք, ի՞նչ մթնոլորտ է տիրում այս պահին:

- Ես միշտ եմ Գյումրիում: Դեռ չեմ հասցրել շփվել մարդկանց հետ, բայց ամեն դեպքում ֆիքսում ենք, որ ՔՊ-ն իշխանազրկվեց, եւ դա դրական արդյունք է: Պետք է փորձենք՝ սրանից հետո էլ կառուցենք դրական մթնոլորտ: