«Դժվար թե ստացվի երկու աթոռի վրա նստել». Ռոդիոն Միրոշնիկն անհնար համարեց Հայաստանի անդամակցությունը և՛ ԵԱՏՄ-ին, և՛ ԵՄ-ին

«Այս քայլը պետք է գնահատվի Հայաստանի քաղաքացիների կողմից. որքանո՞վ է այն համապատասխանում ձեր շահերին և որքանո՞վ են իրատեսական Հայաստանի անդամակցության հեռանկարները»,- ասաց ՌԴ ԱԳՆ հատուկ նշանակության դեսպան Ռոդիոն Միրոշնիկը Երևանում Հայկական Հետազոտական ​​Ինստիտուտի (ARI) և Ռոսսոտրուդնիչեստվոյի կողմից կազմակերպված փորձագիտական ​​քննարկումից առաջ լրագրողների հետ զրույցում։

Լրագրողները նրան խնդրեցին մեկնաբանել, թե ինչպե՞ս է Մոսկվան գնահատում ՀՀ ԱԺ կողմից ընդունված «Եվրոպական միությանը ՀՀ անդամակցելու գործընթացի մեկնարկի մասին» օրենքի նախագիծը։

«Ռուսաստանը միշտ ընդգծել է դա, և մենք մտադիր չենք միջամտել պետությունների, այդ թվում Հայաստանի ներքին գործերին: Դա անկախ որոշում է: Բայց ուշադրություն դարձրեք այլ երկրների դեպքում մի շարք նմանատիպ գործողություններին: Ուկրաինան վաղուց իր Սահմանադրության մեջ ներառել է ԵՄ-ին և ՆԱՏՕ-ին անդամակցելու ցանկությունը։ Որքա՞ն առաջընթաց է գրանցել Ուկրաինան այս գործընթացում։ Ուստի, կարծում եմ, ելնելով որոշ նմանատիպ դեպքերից, և՛ խորհրդարանականները, և՛ քաղաքական գործիչները պետք է որոշակի եզրակացություններ անեն, որոնք կգործեն բացառապես Հայաստանի ժողովրդի շահերից», - ասաց նա:

Հարցին, թե հակասություններ չի՞ ստեղծում այն ​​փաստը, որ Հայաստանը միաժամանակ ՀԱՊԿ-ի և ԵԱՏՄ-ի անդամ է, Ռոդիոն Միրոշնիկն ասաց. «Այս դեպքում դժվար թե հնարավոր լինի համատեղել ԵԱՏՄ և ՀԱՊԿ մասնակցությունը ԵՄ-ի հետ։ Դուք ինքներդ պետք է վերլուծեք այն մոտեցումները, որոնց հիման վրա այս կամ այն որոշումն եք կայացնում։  Վերլուծեք, թե ինչ տնտեսական հեռանկարներ կան։ Գնահատեք այն շուկաները, որոնցում հիմա ներկա է Հայաստանը և այն եկամուտները, որոնք երկիրը ստանում է այս համագործակցությունից: Դժվար թե ստացվի երկու աթոռի վրա նստել»։

Լրագրողների այն մեկնաբանություններին, թե վերջին շրջանում Հայաստանի և Ռուսաստանի Դաշնության միջև հարաբերություններում որոշակի ջերմացում է նկատվում, և որ Նիկոլ Փաշինյանն ընդունել է ՌԴ նախագահ Վլադիմիր Պուտինի հրավերը՝ մասնակցելու Հաղթանակի 80-ամյակի տոնակատարությանը Մոսկվայում, դիվանագետը նշեց. «Մենք դա ողջունում ենք ամեն կերպ, ողջունում ենք մեր հարաբերությունները բոլոր մակարդակներում: Մենք կցանկանայինք խորացնել և կարգավորել հարաբերությունները ՀԱՊԿ-ի շրջանակներում: Մենք ողջունում ենք տնտեսական նախագծերը, որոնք զարգանում են Ռուսաստանի և Հայաստանի միջև: Ռուսական կողմից՝ այստեղ դռները բաց են: Ինչ մտքերով է առաջնորդվում Հայաստանն այս դեպքում, երևի լավ հայտնի է Հայաստանի ղեկավարությանը»:
Աղբյուրը` Panorama.am