Ճոճել այնքան, որ նավակը շրջվի... ՔՊ-ական Վիլեն Գաբրիելյանը դնում է մանդատը

ՔՊ-ական պատգամավոր Վիլեն Գաբրիելյանը, որ Գյումրիում անսթափ վիճակում հայհոյել էր լրագրողներին ու հայտնվել հրապարակային սւանդալի կենտրունում, ի լրումն՝ իրենց ՔՊ-ի ու ՔՊ-ի թեկնածուի վերաբերյալ որոշ արտահայտություններ արել, այսօր հայտարարություն է տարածել, նաև՝ ներողություն է խնդրել: Չնայած այսօր ապրիլի 1-ն է, բայց որոշեցինք այդ հայտարարությունը զետեղել նաև մեր կայքում: Եվ այսպես, Վիլեն Գաբրիելյանը, որ ժամանակին հայտնի էր դարձել ֆեյսբուքյան «Նավակ ճոճող» օգտահաշվով, հայտարարում է.

«Հարգելի հայրենակիցներ, ունեմ հստակ համոզմունք, որ քաղաքական գործընթացներում առանցքային դեր ունի քաղաքական պատասխանատվություն կրելու մշակույթը, իսկ դրա համար էլ համապատասխան կամք ու վճռականություն է պետք, որը ես միշտ տիրապետել եմ:

Անցած կիրակի Գյումրի քաղաքում իմ մասնակցությամբ այսպես ասած միջադեպերը համարում եմ ոչ վայել Հայաստանի Հանրապետության Ազգային Ժողովի պատգամավորի վարքին: ԱԺ պատգամավորն իր առաքելությունում պարտավոր է չդրսևորել անհարկի վարքագիծ:

Ըստ այդմ՝ բոլորիցդ հրապարակային հայցում եմ ներողություն և պաշտոնապես հայտարարում եմ, որ վայր եմ դնում ԱԺ պատգամավորի մանդատս: Դիմումը այսօր սահմանված կարգով կհանձնեմ ԱԺ աշխատակազմ:

Միաժամանակ հայտնում եմ, որ այս պահից սկսած ինքնաառաջադրվում եմ, որպես «Քաղաքացիական պայմանագիր» կուսակցության առաջիկա վարչության ընտրություններում՝ վարչության անդամի թեկնածու, քանզի ինձ համար միանշանակ է, որ մեր կուսակցությունը ունի լրջագույն առողջացման և կերպարանափոխման կարիք:

Ինչպես Սևակն ա ասում, հանուն վաղվա ճշմարտության, թող որ լինեմ այսօր սխալ:

Եղե՛ք՝ զգոն, սառնասիրտ, հավասարակշիռ, ուժեղ, տոկուն»։