Որ ընտրվեմ, կառավարությանը դատի եմ տալու, Բարսեղյան Լևոնն էլ կուրախանա. Վարդան Ղուկասյան

«Գյումրիի հարկային ռեսուրսները 85 մլրդ դրամ են։ ՀՀ Սահմանդրության 185, 186 հոդվածների, ՏԻՄ օրենքի 86-րդ հոդվածի համաձայն,  85 մլրդ դրամ հարկերի դեպքում քաղաքին պետք է հատկացնեն ոչ թե 3 մլրդ 200 մլն, այլ 27-30 մլրդ դոտացիա պետական բյուջեից։ Մինչև այսօր չեն հատկացրել»,-հայտարարել է Գյումրիի քաղաքապետի թեկնածու Վարդան Ղուկասյանը Պետրոս Ղազարյանին տված հարցազրույցում։

Նա նշել է, որ այսօր պետբյուջեից ավելի քիչ գումար է հատկացվում երկրաշարժ տեսած 157 հազար բնակչություն ունեցող քաղաքին, քան օրինակ 8 հազար ուսանող ունեցող ու տարեկան ավելի քան 1 մլն դրամ վարձ վճարող ԵՊԲՀ-ին։

«Մենք ողորմություն չենք խնդրում։ Դա քաղաքի հասանելիքն է։ Դրա համար եթե ես եկա, անպայման պետք է պահանջեմ, եթե չարեցին, պետությանը, կառավարությանը դատի եմ տալու։ Առաջին անգամ Հայաստանի Հանրապետության մեջ կլինի, որ ՏԻ մարմինները համարձակություն ունեն կառավարությանը դատի տալու։ Այդտեղ Լևոնը Բարսեղյան կուրախանա, քանի որ դեմոկրատիան քաղաքում քայլ-քայլ առաջ կգնա, հավանական է նա էլ մեզ կօգնի, քանի որ սիրում է նմանատիպ բաներին մասնակից լինել»,-ասաց Ղուկասյանը։