Շիրակի մարզպետ Դավիթ Առուշանյանը շարունակում է մտքի «գոհարներ» շաղ տալ

ՔՊԿ-ական մարզպետ Դավիթ Առուշանյանը հին, փչացած պլաստինկան է պտտում նախկինների ու ներկաների թեմայով: Ասում է՝ Գյումրու ընտրություններում մասնակցում է երկու ուժ՝ ՔՊ-ն ու մյուսները:

Իրականությունն այն է, որ ընտրություններին մասնակցելու են գյումրեցիները, որոնք տոտալ մերժում են Նիկոլ Փաշինյանի գլխավորած «Քաղաքացիական պայմանագրին»: Դա բացահայտ երևաց Ազատ տնտեսական գոտու թեմայով մեր ստորագրահավաքի ժամանակ: Հավաքվել է 7.700 ստորագրություն:

Մեզ հետ շփված մարդկանց ճնշող մեծամասնությունը մերժում էր «Քաղաքացիական պայմանագրին» և ստորագրման թերթիկի վրա ուզում էր բացի ստորագրությունից նաև այլ բաներ գրել ՔՊ-ի հասցեին:

Ի դեպ, Առուշանյան Դավիթը նեղսրտում է Ազատ տնտեսական գոտու մեր ներկայացրած ծրագրից, թե բա՝ դա կառավարության որոշելիքն է: Ինքը կա՛մ չգիտի, որ մենք էլ ենք նույնն ասել ու բացատրել ենք, որ ավագանին ունենալու է գյումրեցու ձայնը հնչեցնելու ֆունկցիա, կա՛մ իրեն չիմացողի տեղ է դնում: Ավելին՝ մենք ասել ենք, որ Ազատ տնտեսական գոտի ստեղծելու ծրագրի մասին կառավարությունը վերջին որոշումը կայացրել է 2019-ին, բայց այդ ամենը մնացել է թղթի վրա:

Մենք օրենքով սահմանված կարգով գյումրեցիների ստորագրությունը հավաքել ենք (պահանջվում էր 1.100-ի չափ ստորագրություն, բայց մենք հավաքել ենք 7 անգամ շատ), որպեսզի Ազատ տնտեսական գոտու ստեղծման պահանջով ուղերձ հնչի ձևավորվելիք ավագանու կողմից: Ուղերձի տակ կոնկրետ ծրագիր կա: Տվյալ դեպքում գյումրեցին իր ստորագրությամբ ոչ թե խնդրող է դառնում, այլ՝ պահանջող: Այնպես որ, թող դեմագոգիայով չզբաղվեն ՔՊ-ում:

Քաղաքագետ Դերենիկ Մալխասյանի ֆեյսբուքյան էջից