Գյումրին՝ Ազատ քաղաք և Ազատ տնտեսական գոտի

Վերջին օրերին Գյումրիում ընթանում է ստորագրահավաք, որը նպատակ ունի քաղաքին տալ «Ազատ քաղաք» և «Ազատ տնտեսական գոտի» կարգավիճակ։ Գյումրեցի գործարար ու հայրենի քաղաքի արժեքը գիտակցող Կարեն Սիմոնյանի նախաձեռնությունը մեծ արձագանք է գտել գյումրեցիների շրջանում․ ստորագրահավաքի ծավալները վկայում են, որ քաղաքացիները գիտակցում են այս փոփոխության կարևորությունը։

Գյումրին՝ լինելով Հայաստանի երկրորդ խոշորագույն քաղաքը, երկար տարիներ բախվել է սոցիալ-տնտեսական մարտահրավերների։ Ազատ տնտեսական գոտու ստեղծումը հնարավորություն կտա քաղաքին բերել նոր ներդրումներ, ստեղծել նոր աշխատատեղեր և խթանել տեղական արտադրության զարգացումը։ Սա հատկապես կարևոր է գյումրեցիների համար, ովքեր ամուր կանգնած են իրենց հողի վրա և ցանկանում են բարելավել կյանքի որակը։

Կարեն Սիմոնյանի նախաձեռնությունը ոչ միայն տնտեսական, այլև քաղաքացիական ու ազգային նշանակություն ունի։

Գյումրին իր անցյալով և մշակութային ժառանգությամբ հանդիսանում է ազգային դիմադրության խորհրդանիշ։

Գյումրիի բնակիչները համոզված են, որ ազատ տնտեսական գոտու կարգավիճակը հնարավորություն կտա իրենց քաղաքին դառնալ Հայաստանի տնտեսական կենտրոններից մեկը, որն իր ուրույն տեղը կգտնի միջազգային շուկայում։

Նախաձեռնության հեղինակ Կարեն Սիմոնյանը նշում է, որ այս գործընթացն անհրաժեշտ է իրականացնել թափանցիկ և մասնագիտական ուսումնասիրությունների հիման վրա։ Այն կարող է խթանել նաև զբոսաշրջությունը, նորարարական բիզնեսները և կրթական ծրագրերը, որոնք կբարձրացնեն քաղաքի տնտեսական կենսունակությունը։

Ստորագրահավաքի տեմպը ցույց է տալիս, որ գյումրեցիները պատրաստ են պայքարել իրենց քաղաքի համար՝ հանուն զարգացման և բարգավաճման։ Այս նախաձեռնության շուրջ ձևավորված համախմբվածությունը վկայում է, որ Գյումրին ունի ներուժ վերածվելու զարգացող տնտեսական կենտրոնի, ինչը կծառայի ոչ միայն տեղացիներին, այլև ամբողջ երկրի առաջընթացին։
«Մայր Հայաստան» շարժման անդամ Սոնա Աղեկյանի էջից