Ավինյանը բացահայտորեն ծաղրում է երևանցիներին, «ղժժում» է հանրության վրա

Ավինյանի քաղաքապետարանը այսօրվա տրանսպորտային խայտառակության վերաբերյալ տարածել է մի հայտարարություն, որը դժվար է բնութագրել այլ կերպ, քան՝ ձեռառնոցի: Այսինքն, քիչ է, որ թանկացրած ուղեվարձով բազմաթիվ ավտոբուսներ կեսից ուղևորներին հայտնել են, որ չեն կարող ընթացքը շարունակել, ու մարդիկ տեղ չհասած, ստիպված են եղել իջնել հանրային տրանսպորտից: 
Քիչ է, որ երթևեկությունը Երևանում խայտառակ վիճակում էր հայտնվել, մի հատ էլ նման հայտարարությամբ Ավինյանը, կարելի է ասել՝ ծաղրում է երևանցիներին (դե, երևի իր հոր օրինակով, որ «Օփել» վարողներին անվանել է համբալ), խոսակցականով ասած՝ «ղժժում» է հանրության վրա: 
Ահա Ավինյանի գլխավորած Երևանի քաղաքապետարանի այդ հայտարարությունը․

«Սիրելի երևանցիներ,

Երևանում շարունակվող առատ ձյան տեղումները լուրջ դժվարություններ են առաջացրել ինչպես տրանսպորտի, այնպես էլ փողոցների անցանելիության առումով։ Մաքրման աշխատանքները ընթանում են արտակարգ ռեժիմով, բայց տեղումների ինտենսիվությունը դեռ շատ բարձր է, ինչի հետևանքով ճանապարհները կրկին ծածկվում են ձյունով, իսկ խցանումները հաճախ խոչընդոտում են ձնամաքրման մեքենաների օպերատիվ տեղաշարժը։

 Քաղաքային տրանսպորտի աշխատանքը դժվարացած է, հնարավոր են ուշացումներ։

 Ի՞նչ աշխատանքներ են կատարվում այս պահին․

Մաքրման աշխատանքներն իրականացվում են անընդմեջ, ներգրավված է ողջ տեխնիկան և համապատասխան թիմերը։

Հատուկ ուշադրություն է դարձվում հիմնական ճանապարհներին և տրանսպորտային հանգույցներին՝ ապահովելու քաղաքացիների տեղաշարժի հնարավորությունը։

Ծառայությունները շարունակում են աշխատել արտակարգ ռեժիմով՝ ապահովելու քաղաքի բնականոն գործունեությունը։

Շնորհակալ ենք ձեր ըմբռնման համար և կոչ ենք անում ցուցաբերել զգոնություն՝ պահպանելով անվտանգության կանոնները»։