Ցուկերբերգը հայտարարել է Facebook-ում, Instagram-ում և Threads-ում գրաքննության կտրուկ սահմանափակման մասին

Մարկ Ցուկերբերգն ասել է, որ Facebook-ը, Instagram-ը և Threads-ն այլևս խստորեն չեն վերահսկի օգտատերերի գրառումների բովանդակությունը և մեղադրել է Եվրոպային «գրաքննությունը ինստիտուցիոնալացնելու մեջ»:

Մարկ Ցուկերբերգն ընդունել է գրաքննության առկայությունը Facebook, Instagram և Threads սոցիալական ցանցերում և հայտարարել բովանդակության սահմանափակման կտրուկ թուլացման մասին։ «Դոյչե Վելե»-ի փոխանցմամբ, Meta Platforms Inc.-ի ղեկավարը այդ մասին տեսաուղերձով հանդես է եկել հունվարի 7-ին։

Ներկայումս Meta Group-ի սոցիալական ցանցերում գործում է փաստերի ստուգման համակարգ։ Ինչպես նշվում է Facebook-ի կայքում, դա անում են «փաստերի ստուգման անկախ երրորդ կողմի կազմակերպությունները, որոնք հավաստագրված են անկախ միջազգային փաստերի ստուգման ցանցի կամ Եվրոպական փաստերի ստուգման ցանցի կողմից»:

Ցուկերբերգը հայտարարել է այս համակարգի վերացման մասին, քանի որ, ըստ նրա, այն անցել է գրաքննության։ Դրա դիմաց գործարարը ներկայացնում է Community Notes համակարգը, որն արդեն գործում է Իլոն Մասկի X սոցիալական ցանցում։ Այնտեղ օգտատերերն իրենք են բողոքում ոչ պատշաճ բովանդակությունից և ուղղում են սխալները։ Ցուկերբերգը հստակ ասել է, որ նոր համակարգը կլինի «X-ի նման»։

«Երբ Թրամփն ընտրվեց 2016-ին, հիմնական լրատվամիջոցները անդադար հայտնում էին այն մասին, թե ինչպես է ապատեղեկատվությունը սպառնում ժողովրդավարությանը: Մենք բարեխղճորեն փորձեցինք լուծել այդ խնդիրները՝ չդառնալով ճշմարտության արբիտրներ: Բայց փաստերը ստուգողները  քաղաքականապես չափազանց կողմնակալ էին և ավելի նվազեցրեցին վստահությունը, քան նրանք ստեղծել էին, հատկապես ԱՄՆ-ում»,- խոստովանել է Ցուկերբերգը։

Ցուկերբերգ. Մենք զգալիորեն կնվազեցնենք գրաքննության չափը
«Facebook-ում և Instagram-ում ազատ արտահայտվելու խնդրի հետ կապված ժամանակն է վերադառնալու մեր արմատներին»,-ասել է «Մետա»-ի ղեկավարը:

«Մենք կառուցել ենք շատ բարդ համակարգեր՝ բովանդակությունը չափավորելու համար: Բայց բարդ համակարգերի խնդիրն այն է, որ նրանք սխալներ են թույլ տալիս: Նույնիսկ եթե նրանք պատահաբար գրաքննում են բովանդակության միայն 1%-ը, բայց այն միլիոնավոր մարդիկ են: Եվ մենք հասել ենք մի կետի երբ կան չափազանց շատ սխալներ և գրաքննություն»,- շարունակել է Ցուկերբերգը՝ խոստանալով «վերականգնել սոցհարթակներում արտահայտվելու ազատությունը»:

Նրա խոսքով՝ այսուհետ Facebook-ը, Instagram-ը և Threads-ը կպարզեցնեն իրենց բովանդակության կարգավորման քաղաքականությունը։ Սոցիալական լրատվամիջոցների ղեկավարները մտադիր են «վերացնել բազմաթիվ սահմանափակումներ այնպիսի թեմաների վերաբերյալ, ինչպիսիք են ներգաղթը կամ սեռը, որոնք չեն համընկնում հիմնական լրատվամիջոցների դիսկուրսի հետ»:

Կփոխվի նաև բովանդակության կարգավորման մոտեցումը։ Դա արվում է «սխալները նվազեցնելու համար, որոնք մեր հարթակում գրաքննության դեպքերի ճնշող մեծամասնությունն են», - ասել է Ցուկերբերգը: Նրա խոսքով՝ այժմ Meta-ի ավտոմատ զտիչները կարգելափակեն միայն կոպիտ խախտումները, իսկ օգտատերերին կվստահեն չնչինների ուղղումը։

«Խնդիրն այն է, որ զտիչները սխալներ են թույլ տալիս: Նրանք արգելափակում են չափազանց շատ բովանդակություն, որը չպետք է արվի: Հետ դարձնելով դրանք՝ մենք մտադիր ենք զգալիորեն նվազեցնել գրաքննության չափը մեր հարթակներում», - ասել է Ցուկերբերգը:
Նա նաև խոստացել է քաղաքական բովանդակությունը վերադարձնել առաջարկությունների հատված, քանի որ «կարծես թե հիմա նոր դարաշրջանում ենք»։

Ցուկերբերգը նաև որոշել է Meta-ի բովանդակության մոդերատորական թիմերը Կալիֆորնիայից տեղափոխել Տեխաս: Ավելի վաղ Իլոն Մասկը նույն որոշումն էր կայացրել SpaceX-ի վերաբերյալ։

Ուղերձի վերջում Ցուկերբերգը խոստացել է, որ ԱՄՆ ընտրված նախագահ Դոնալդ Թրամփի հետ միասին այլ երկրներում, այդ թվում՝ եվրոպական պայքարելու է գրաքննության դեմ ։

«Մենք կաշխատենք նախագահ Թրամփի հետ՝ մարտահրավեր նետելու ամբողջ աշխարհի կառավարություններին, որոնք ճնշում են ամերիկյան ընկերություններին և խթանում են գրաքննությունը: ԱՄՆ-ն ունի աշխարհի ամենաուժեղ սահմանադրական պաշտպանությունը ազատ խոսքի համար: Եվրոպան ընդունել է ամենաշատ օրենքները գրաքննությունը ինստիտուցիոնալացնելու համար՝ դժվարացնելով այնտեղ որևէ նորարարական բան անելը»,- ասել է Ցուկերբերգը։ Նա նաև անդրադարձել է, Լատինական Ամերիկայում և Չինաստանում առկա գրաքննությանը ։

Իլոն Մասկի արձագանքը
«Սա հիանալի է», - մեկնաբանել է Իլոն Մասկը Ցուկերբերգի կոչը: Մասկը նաև վերահրապարակել է X օգտատիրոջ կարծիքը, որը գրել է, թե Meta-ի ղեկավարը «ամբողջովին դեմ է գրաքննությանը՝ հետևելով Իլոնին և X-ին»։