Հայաստան-Իրան-Հնդկաստան երթուղու գործարկման եռակողմ հանդիպումը չի կայացել․ մանրամասներ
Նոր առևտրային երթուղու գործարկման շուրջ Հայաստանի, Իրանի և Հնդկաստանի մասնակցությամբ սեպտեմբերին նախատեսված եռակողմ հանդիպումը չի կայացել: Այս մասին Sputnik Արմենիայի հարցմանն ի պատասխան հայտնեցին ՀՀ էկոնոմիկայի նախարարությունից։
«Նշված հանդիպումը չի կայացել Իրանում տեղի ունեցած հայտնի իրադարձությունների (Իրան-Իսրայել սրված հակամարտություն-խմբ.) պատճառով»,-նշել են գերատեսչությունում:
Այնուամենայնիվ, Հայաստանը շարունակում է մուլտիմոդալ արագընթաց երթուղու ստեղծման վերաբերյալ նախնական քննարկումները, սակայն դրա գործարկման վերջնական ժամկետները դեռևս անորոշ են:
Անհասկանալի է մնում նաև Հայաստանի դերը իրանական Չաբահար նավահանգստի կառավարման գործում։
«Նավահանգստի հարցում Հայաստանի մասնակցության ձևաչափը դեռ քննարկվում է»,-նշել են գերատեսչությունում:
Հայաստանի տարածքով նախատեսվող երթուղին ենթադրում է բեռների առաքում Հնդկաստանի և Պարսից ծոցի նավահանգիստներից դեպի Եվրոպա և ԵԱՏՄ։ Սխեմայի համաձայն՝ հնդկական Մումբայ նավահանգստից ապրանքները կարող են առաքվել Չաբահար, այնուհետև ցամաքային ճանապարհով տեղափոխվել Հայաստան, ապա՝ Վրաստան։
Վրացական նավահանգիստներից բեռները կարող են ուղղվել կամ Բուլղարիա և Հունաստան, կամ «Վերին Լարսով»՝ Ռուսաստան։
Հետևեք մեզ Facebook-ում