«Կորցրիք Արցախը, նրան դա ոչինչ չսովորեցրեց, հիմա նա ցանկանում է Հայաստանը կորցնել»,-Ստանիսլավ Տարասով

«Հայաստանի անվտանգության շահերից է բխում ՀԱՊԿ անդամ լինելն առավելագույնս օգտագործելը: ՀԱՊԿ-ից դուրս գալու վերաբերյալ փաստաթղթեր չենք ստացել»: ՌԴ ԱԳ նախարար Սերգեյ Լավրովն այսպես է մեկնաբանել Նիկոլ Փաշինյանի հայտարարությունն այն մասին, թե «մենք մեզ արդեն իսկ համարում ենք ՀԱՊԿ-ից դուրս, եւ իրենք ինչ ուզում են, թող որոշեն»: Նախօրեին Նիկոլ Փաշինյանն ԱԺ ամբիոնից նաեւ հայտարարեց, թե կարծում է, որ «մենք էդտեղ անդառնալիության կետը, ըստ էության, անցել ենք»:

Վարչապետի այս հայտարարությունից առաջ ՀԱՊԿ գլխավոր քարտուղար Իմանգալի Տասմագամբետովն ասել էր, թե Հայաստանը ցանկացած պահի կարող է վերադառնալ կազմակերպության աշխատանքներին, եւ վերադարձի համար առարկություններ կամ խոչընդոտներ չկան։ Իսկ դրանից առաջ՝ նոյեմբերի 28-ին, Աստանայում Պուտինն էր անդրադարձել Հայաստան-ՀԱՊԿ հարաբերություններին ու հայտարարել. «Յուրաքանչյուր անդամ երկիր ինքն իր համար է որոշում՝ ինչն է իր ազգային շահերին համապատասխանում, մենք դրան հարգանքով կմոտենանք։ Բայց չէ՞ որ Հայաստանը չի հայտարարել ՀԱՊԿ-ից դուրս գալու մասին, համենայնդեպս՝ դեռ չի հայտարարել, այլ միայն նշել է, որ ընդմիջում է վերցնում։ Միեւնույն ժամանակ, Հայաստանը հավանություն է տալիս բոլոր փաստաթղթերին, որոնք ընդունվում են մեր այսօրվա հանդիպման եւ բանակցությունների ընթացքում։ Եթե դա այդպես է, ապա հնարավորություն կա, որ Հայաստանը, ի վերջո, կվերադառնա ՀԱՊԿ-ում ամբողջական ֆորմատով աշխատանքին, բայց էլի կրկնեմ՝ դա յուրաքանչյուր երկրի որոշումն է»:

ՀՀ իշխանություն-ՀԱՊԿ հարաբերությունները, ինչպես Փաշինյանն է ձեւակերպել, սառեցվեցին այն բանից հետո, երբ Նիկոլ Փաշինյանն այդ ռազմաքաղաքական կառույցից պահանջեց ցույց տալ, թե որն է Հայաստանի սահմանը, ու քաղաքական գնահատական տալ Ադրբեջանի գործողություններին: Աստանայում Պուտինը հայտարարել էր․ «ՀԱՊԿ-ը չէր կարող միջամտել, որովհետեւ Հայաստանի հանդեպ ոչ մի արտաքին ագրեսիա տեղի չի ունեցել»։ Սրան ի պատասխան, Փաշինյանը նախօրեին՝ ԱԺ ամբիոնից 2021 եւ 2022 թվականների ադրբեջանական ագրեսիան հիշեց, չնայած այդ օրերին հենց ինքն էր կառավարության նիստում հայտարարում, որ չկրակելու հրաման է տվել, քանի որ «Սեւ լճի 30 տոկոսի համար հո պատերազմ չե՞նք սկսելու…»:

«Նա մեզ հետ նարդի է խաղում, եթե նա իսկապես կարծում է, որ ՀԱՊԿ-ում համագործակցությունն ավարտված է, թող դիմում գրի եւ դուրս գա, ո՞վ է նրան բռնել: Նա գիտի ընթացակարգը, որ դա հենց այնպես չի կարող տեղի ունենալ, խոսքը պետությունների միջեւ հարաբերությունների մասին է: Կան պատճառնե՞ր, կա դժգոհությո՞ւն, կա մոտիվացիա՞, խնդրեմ՝ դիմում գրեք եւ հեռացեք, բայց երբ դա չեք անում, նշանակում է՝ փորձում եք ինչ-որ մեկի ականջներից լապշա կախել»,- Հայաստան-ՀԱՊԿ էպոպեայի հերթական արարի մասին «Հրապարակ»-ին ասում է ռուս վերլուծաբան Ստանիսլավ Տարասովը:   

Ըստ Տարասովի՝ Փաշինյանն իր գործելակերպով փորձում է Արեւմուտքին ցույց տալ, թե «վիճել է» Ռուսաստանի հետ, բայց իրականում նա Ռուսաստանից չի հեռանում: «Մոսկվան այդպես է սա դիտարկում՝ նա փորձում է Արեւմուտքից ինչ-որ բան ստանալ՝ փնովելով Ռուսաստանին, հետո կփորձի Ռուսաստանից ինչ-որ բան ստանալ՝ փնովելով Արեւմուտքին, այո՞: Գիտե՞ք, դա շատ պրիմիտիվ է եւ խոսում է ինտելեկտի, կրթության բացակայության մասին»,- ասում է Ստանիսլավ Տարասովը եւ ընդգծում՝ Մոսկվան ընթացակարգերով է գործում ու հստակ նշում է՝ ինքներդ որոշեք, բայց հետո չասեք՝ Ռուսաստանը մեզ վռնդեց: 

«Չե՞ք ուզում աշխատել` դուրս եկեք, բայց եթե մենք այդ որոշումը կայացնենք, Փաշինյանը կասի՝ ռուսները մեզ դուրս վռնդեցին»,- նկատում է Տարասովը: Որքա՞ն կարող է Մոսկվան հանդուրժել եւ կտրուկ գործողությունների չգնալ` ի պատասխան Հայաստանի իշխանությունների նման պահվածքին: Տարասովի խոսքով, մինչեւ այն պահը, երբ Փաշինյանը կստանա պատմության հերթական դասը: «Կորցրիք Արցախը, նրան դա ոչինչ չսովորեցրեց, հիմա նա ցանկանում է Հայաստանը կորցնել»,- ասում է ռուս փորձագետը՝ էժանագին արգումենտ համարելով Փաշինյանի այն պնդումը, թե ՀԱՊԿ-ը չի ասում, թե որն է Հայաստանի սահմանը:

«Էժանագին արգումենտներ են, այդպես չի կարելի խոսել Պուտինի հետ: Դուք չեք աշխատում, չեք մասնակցում աշխատանքներին, երբ ինչ-որ խնդիր լինի, պետք է ասեք, ահա, ՀԱՊԿ-ը մեզ կօգնի՞»,- հարցնում է Տարասովը, որի կարծիքով՝ Փաշինյանի նպատակն Արեւմուտքից անվտանգության երաշխիքներ ստանալն է, որը նրան այդպես էլ չի տրվում:

«Նա Հայաստանն է հանձնում, կարծում է, որ Արեւմուտքը Հայաստանին անվտանգության երաշխիքներ է տալու, բայց Արեւմուտքը դա չի անում»,- եզրափակում է ռուս վերլուծաբանը: