Իրանը մեղադրում է ԱՄՆ-ին, Մեծ Բրիտանիային ու Սաուդյան Արաբիային (Տեսանյութ)

Իրանի հոգևոր առաջնորդ այաթոլլա Ալի Խամենեին հայտարարել է, որ Իրանի թշնամիներն օգտագործում են իրենց ունեցած բոլոր միջոցները, որպեսզի ապակայունացնեն երկիրը և այնտեղ անկարգություններ հրահրեն։

Հիշեցնենք, որ դեկտեմբերի 28-ից Իրանական Fars գործակալությունը դեկտեմբերի 29-ին հայտնել էր վեց քաղաքում զանգվածային ցույցերի մասին։ Ըստ իրանական լրատվամիջոցների՝ ցույցերն ուղղված են երկրի կառավարության վարած տնտեսական քաղաքականության դեմ։

նդրադառնալով շուրջ մեկ շաբաթ Իրանում ընթացող բողոքի գործողություններին, այաթոլլա Ալի Խամենեին նաև նշել է.

«Վերջին իրադարձություններում Իրանի թշնամիները միավորվել են և իրենց ունեցած տարբեր միջոցներն են օգտագործել, այդ թվում՝ փող, զենք, քաղաքականություն և հետախուզական ուժեր, որպեսզի անհանգստացնեն Իսլամական Հանրապետությանը։ Թշնամին մշտապես ցանկացած հնարավորություն և սողանցք է փնտրում՝ ներխուժելու և իրանական ազգին հարված հասցնելու նպատակով»։

Իսկ Իրանի Անվտանգության բարձրագույն խորհրդի քարտուղար Ալի Շահմանին ցույցերի կազմակերպման մեջ մեղադրել է ԱՄՆ-ին, Մեծ Բրիտանիային և Սաուդյան Արաբիային։ Նա նշել է, որ այդ երկրների իշխանությունները վերահսկում են սոցիալական ցանցերում առկա բողոքական տրամադրությունները և ընդգծել է, որ նրանց գործողությունները Իրանի ներքին գործերին կազմակերպված միջամտություն են։

Վերջին տվյալների համաձայն՝ ցույցերի հետևանքով զոհերի թիվը հասել է 20-ի:

Իր հերդին Իրանի ԱԳՆ-ն քննադատել է երկրում տիրող իրավիճակի մասին Թրամփի հայտարարությունը:

«Նա վերջերս իրանցի ժողովրդին նկարագրել է որպես «ահաբեկչական երկիր» և շարունակում է սադրել իրանցի ժողովրդին», - գործչին մեջբերում է «ԻՐՆԱ» գործակալությունը:

Zham.am