Իվանիշվիլին այսօր քվեարկության ընթացքում հայտարել է որ «օտար պետությունը փորձում է Վրաստանը մտցնել պատերազմի մեջ»

Այսօր «Վրացական երազանքի»   առաջնորդ  Բիձինա Իվանիշվիլին քվեարկել է Թբիլիսիի Մթածմինդա շրջանի ընտրատեղամասերից մեկում։

Լրագրողների առաջև նա կոչ է արել վրացիներին  ակտիվ մասնակցել քվեարկությանը քանզի, ըստ նրա այսօր դրված է Վրաստանի լինելու և չլինելու խնդիրը:

«Ես ուզում եմ կոչ անել հանրությանը՝ գնալ ընտրության. Մենք պետք է շատ պարզ ընտրություն կատարենք. կա՛մ կընտրենք իշխանություն, որը կծառայի ձեզ՝ վրաց ժողովրդին, հայրենիքին, կհոգա երկրի մասին, կա՛մ կընտրենք օտարերկրյա գործակալների, որոնք միայն կկատարեն օտար պետության խնդիրները»,- նշել է նա:

Շարունակելով իր միտքը՝ Իվանիշվիլին բառացիորեն հայտարարել է հետևյալը.

«... Այսօրվա ընտրությունները եզակի են նրանով, որ օտար երկիրն ունի իր սեփական շահերը, որոնք կարող են անմիջապես  կյանքի կոչվել   գործակալների միջոցով, եթե մենք ընտրենք նրանց: Ինչպես գիտեք, մեր հարևանությամբ պատերազմ է ընթանում։ Գործակալներին ղեկավարող երկիրը, որը, ցավոք, այսօր ակտիվ  քաղաքական դերակատարություն ունի,  Վրաստանին ռազմական գործողությունների մեջ ներքաշելու խնդիր է դրել:

Վստահեցնում եմ՝ շատ ժամանակ չի անցնի նոր պատերազմի մեջ մխրճվելու համար, եթե գործակալները հայտնվեն իշխանության մեջ։ Դա տեղի կունենա ակնթարթորեն: Երկրի զարգացման մասին հոգալու փոխարեն, աղետ ենք ստանալու, երկիրը ավերակների ենք վերածելու...»,- վերջում հայտարարել է Իվանիշվիլին:

Իվանիշվիլու այս կտրուկ հայտարարությունը շատերին է զարմացնել: Դիտորդների կարծիքով այսչափ կտրուկ նա չէր արտահայտվել նախկինում:

Բայց այնուամենայնիվ, նա չասաց, թե կոնկրետ որ երկրին էր նա ակնարկում, երբ նշում էր, որ այն ցանկանում է օր առաջ տեսնել Վրաստանը պատերազմի մեջ:

Մի մասը կարծում է, որ դա վերաբերվում էր Ուկրաինային, իսկ մյուս մասի կարծիքով՝ նրա հասցեագրումը  հավաքական բնույթի էր:

 Դավիթ Մկրտչյան
Zham.am