Բողոքի անհնազանդության գործողություններ են իրականացվում․ բռնի ուժ կիրառելով՝ բերման են ենթարկում քաղաքացիներին (ուղիղ միացում, թարմացվող)

Վաղ առավոտից հանրապետությունում մեկնարկել են բողոքի խաղաղ անհնազանդության գործողությունները։

Հիշեցնենք, որ մայիսի 26-ին Հանրապետության հրապարակում հրավիրված հանրահավաքին Բագրատ Սրբազանը հայտարարել էր․ «Առավոտյան ժամը 08։00-ին մեկ մարդու նման պետք է սկսվեն անհնազադության ակցիաները, եթե ուզում եք, որ այս մարդիկ օր առաջ հեռանան: Ոչ թե նայեք իմ դեմքին, սիրելի ժողովուրդ, այլ միմյանց դեմքերին նայենք: Միմյանց պետք է տեսնենք միևնույն խրամատում: Մենք չպետք է թողնենք իրենց` գալու աշխատանքի, որովհետև իրենք աշխատանք չունեն, վաղուց ազատված են այդ գործից: Թե՛ բարոյապես, թե՛ ֆիզիկապես իրենք դադարել են լինել այն պաշտոնյաները, որոնց դուք, իրենց բառերով, վարձել եք, որ ձեզ ծառայեն:

Առավոտից բացի Տավուշ և Լոռի տանող ճանապարհներից մնացած բոլոր ճանապարհները փակ պետք է լինեն»:

***

Այս պահին փակ են Ուլնեցու, Տերյան, Կորյուն փողոցները, Երևան-Աշտարակ ճանապարհը, Հին Երևանցու փողոցը, Աբովյան-Մոսկովյան խաչմերուկը, Մաշտոցի պողոտան, Խանջյան-Տիգրան Մեծ խաչմերուկը, Դավիթ Անհաղթ-Ուլնեցի խաչմերուկը, Արմավիր-Մեծամոր ճանապարհը, Աճառյան փողոցը, Սայաթ Նովա-Տերյան խաչմերուկը։

***

Բագրատ Սրբազանի մեքենան ԱՊՊԱ պատահար գրանցեց Սայաթ Նովա-Աբովյան խաչմերուկում։ Աբովյան փողոցն այս պահին փակ է այդ հատվածում։

***

Երևան-Արմավիր ճանապարհը փակ է Արշալույս գյուղի հատվածում:

***

Կարմիր բերետները փորձում են «բերման ենթարկել» Բագրատ Սրբազանի հայտնի մեքենան, որով նա արգելափակել է Աբովյան փողոցը:

***

Երևան-Արմավիր ճանապարհը շարունակում է փակ մնալ բեռնատարների օգնությամբ:

***

Քաղաքացիները ծխերով և պարկերով արգելափակել են Սարալանջի փողոցը:

***

Երևան-Սևան մայրուղին փակ է Չարենցավանի հատվածում: