«Երևանի քաղաքապետարանը շուրջ 1 միլիարդ դրամի միջոցառումների կազմակերպման ոչ մրցակցային ընթացակարգեր է կիրառել». Արմենուհի Բուռնազյան (տեսանյութ)

«Պետական մարմինների կողմից ոչ մրցակցային գնման ընթացակարգերի շատ ավելի կիրառության գլխավոր պատճառներից մեկը 2023թ. եղել է Արցախի Հանրապետության հետ կապված»,- «Պետական գնումներում կոռուպցիոն ռիսկերը և հանրային վերահսկողությունը» թեմայով քննարկման ժամանակ հայտարարեց «Հանրային քաղաքականության հետազոտությունների ազգային կենտրոն» ՀԿ գործադիր տնօրեն Արմենուհի Բուռնազյանը։
Ինչպես գրում է 168.am-ը, այդուհանդերձ, ըստ Արմենուհի Բուռնազյանի, ոչ մրցակցային ընթացակարգերով կատարված գնումների՝ տոկոսային առումով փոփոխությունը նախորդ տարվա համեմատ այնքան էլ մեծ չի եղել։
«2022 թվականի 11 ամիսների ընթացքում այն եղել է գնումների ընդհանուր ծավալի մոտավորապես 42 տոկոսը, 2023-ին այն ընդամենը 2 տոկոսով է նվազել։ Այստեղ մենք տեսնում ենք որոշակի խնդիրներ, օրինակ, միջոցառումների կազմակերպման հետ, որոնց համար ևս շարունակում են կիրառվել ոչ մրցակցային գնման ընթացակարգեր,- ասաց նա և տեղեկացրեց,- Հիմնականում 2023 թվականին Երևանի քաղաքապետարնի կողմից շուրջ 1 միլիարդ դրամի միջոցառումների կազմակերպման համար ոչ մրցակցային ընթացակարգեր են կիրառվել»:
Ֆինանսների նախարարության Գնումների քաղաքականության վարչության պետ Սերգեյ Շահնազարյանն էլ նկատեց՝ ոչ մրցակցային գնումների հիմնական մասն առողջապահության ոլորտին է բաժին ընկնում, սակայն շեշտեց՝ կարևոր է, որ նվազում են հրատապության հիմքով մեկ անձից գնումները:
«2022 թվականի հունվար-նոյեմբեր ժամանակահատվածում դա եղել է 13,7 մլրդ  դրամ, իսկ այս տարի՝ 9.3 մլրդ է, որից 3 մլրդ-ը ԼՂ խնդրի հետ կապված գնումներն են»,- հայտարարեց Սերգեյ Շահնազարյանը՝ տեղեկացնելով ոլորտում սպասվող բարեփոխումների մասին:

Մանրամասները՝ տեսանյութում