Վաշինգտոնը ողջունում է, որ Հայաստանի «պապան» այլևս Թուրքիան ու Էրդողանն են

Միացյալ Նահանգները ողջունում է Թուրքիայի արդյունավետ դերը Ադրբեջանի և Հայաստանի միջև հարաբերությունների կարգավորման գործում։ Ինչպես հաղորդում է tert.am-ը, այս մասին ճեպազրույցի ժամանակ հայտարարել է ԱՄՆ Պետքարտուղարության խոսնակ Մեթյու Միլլերը։
«Այս թեման ԱՄՆ պետքարտուղար Էնթոնի Բլինկենի և Թուրքիայի արտաքին գործերի նախարար Հաքան Ֆիդանի բոլոր քննարկումների մասն է: Մենք ողջունում ենք Թուրքիայի արդյունավետ դերն այս հակամարտության կարգավորման հարցում: Մենք համաձայն ենք Ֆիդանի այն խոսքերի հետ, որ խաղաղությունը հնարավոր է: Միացյալ Նահանգները սատարում է երկու կողմերի ուղիղ բանակցություններին՝ խաղաղության հասնելու համար»,-ասել է Միլլերը:
Նշենք, որ ավելի վաղ Ադրբեջանում գտնվող Ֆիդանը հայտարարել էր, որ հաջորդ շրջանը պետք է դառնա Հարավային Կովկասում կայունության սկիզբը։
--
Մեր կողմից նկատենք, որ «Թուրքիայի դերը» հայ-ադրբեջանական հարաբերությունների կարգավորման գործում բավականին չարագուշակ է հնչում ու ոչ միայն՝ հնչում: Միայն ապուշը կարող է չհասկանալ, որ «Թուրքիայի դերը» կարող է լինել միայն Հայոց ցեղասպանությունը մեկնարկից ավելի քան 100 տարի անց ավարտին հասցնելը, Հայաստանի վերացումը, հայության իսպառ բնաջնջումը՝ իր պատմական հայրենիքում: Մի խոսքով, Վաշինգտոնում չափազանց ուրախ և երջանիկ են, որ վերջապես մեր տարածաշրջանում «պապան», այսինքն՝ հարցեր կարգավորողը Թուրքիան է: Մեծ հաշվով՝ ԱՄՆ-ի համար դա միևնույնն է, իրենց համար կարևոր է, որ տարածաշրջանից հեռացնեն Ռուսաստանը կամ չեզոքացնեն ռուսական ազդեցությունը: Իսկ թե այդ ընթացքում ի՞նչ կլինի Հայաստանի ու հայերի հետ, կներեք, խոշոր խաղացողները խորապես թքած ունեն: Դատելով ամենից, Հայաստանի գոյության ու ճակատագրի վրա վրա ամենից առաջ թքած ունեն հենց Հայաստանի քաղաքացիները, բնակիչները, քաղաքական ուժերն ու գործիչները, առաջին հերթին՝ օտարների շահերն սպասարկող իշխանությունը: 
Zham.am