Իսրայելի գործողությունների դեմ բողոքող ցուցարարները ներխուժել են ԱՄՆ Կոնգրեսի շենք և ընդհատել Բլինքենի ելույթը (տեսանյութ)

Ինչպես հաղորդում է Tert.am-ը, ԱՄՆ-ում ցուցարարները ներխուժել են Կոնգրեսի շենք և ընդհատել պետքարտուղար Էնթոնի Բլինքենի ելույթը՝ պահանջելով դադարեցնել կրակը Գազայի հատվածում։ Համապատասխան կադրերը հրապարակել է CNN հեռուստաալիքը։
Ցուցարարները Կոնգրեսի շենք են ներթափանցել Վաշինգտոնի կողմից Իսրայելին ու Ուկրաինային լրացուցիչ ֆինանսական օգնություն տրամադրելու վերաբերյալ խորհրդարանական լսումների ժամանակ։
«Ամոթ» վանկարկելով նրանք բարձրացրել են պաստառներ, որոնց վրա եղել են «Ո՛չ Գազայում Իսրայելի կողմից ցեղասպանության իրականացմանը», «Ո՛չ Գազայի պաշարմանը» և «Դադարե՛ք փող տալ Իսրայելին» գրությունները։
Բլինքենն, իր հերթին, երկու րոպե լուռ հետևել է՝ ինչպես է ոստիկանությունը շենքից դուրս բերում ակտիվիստներին։
***
Մեր կողմից հավելենք, որ ակամայից մի քիչ նախանձում ես ամերիկացի ակտիվիստներին. մարդիկ, իրենց միգուցե անգամ ուղղակիորեն չառնչվող Գազայի համար իրենց Կոնգրեսի շենք են ներխուժում և «լռեցնում» պետքարտուղարին: Իսկ մեր երկրում, իշխանությունը երկիրն ու ժողովրդին ընկղմել է մղձավանջի ու շարունակական աղետների մեջ, բայց «Կոնգրեrի շենքում», առհասարակ, որևէ տեղ ոչ մի նման «ակտիվիստություն» չի կատարվում: 
Մյուս կողմից, ԱՄՆ «հետամնաց» ոստիկանները շատ հացուպանիր պիտի ուտեն՝ փաշինյանական «կարմիր բերետավոր» «ոստիկաններին» հասնելու համար: Այ, եթե «ժողովրդավարության բաստիոնի» «ոստիկանները» լինեին ԱՄՆ Կոնգրեսի շենքում, ցուցարար ակտիվիստուհիներին, նրանց պլակատներով հանդերձ, այնպես կհոշոտեին, այնպես պատառ-պատառ կանեին, որ Բլինքենը ոչ միայն կլռեր, այլև՝ կպապանձվեր: Իսկ կոնգրեսականներից մեկնումեկն էլ կասեր՝ «ծափ տվեք, արա...»: