Անգիր անելով մարդիկ դառնում են տնտեսագետ, իրավաբան, դատավոր․ Վահե Գրիգորյան

Վահե Գրիգորյանը ֆեյսբուքյան իր էջում գրում է․

Կրթական համակարգը վաղուց հոգեվարքի մեջ է, իսկ սրանք ընդամենը մեխում են հագուցյալի դագաղի վերջին մեխը: Գիտելիքն ունի երկու պարտադիր բաղադրիչ` տվյալներ և վերլուծություն: Տվյալների չիմացության արդյունքում ստանում ենք տխմար ու տգետ վերլուծություններ, իսկ առանց վերլուծության` զուտ տվյալագիտության առկայությամբ ստանում ենք սեփական մտքեր չունեցող ու վերլուծելու անկարող կամակատարներ, կարճ ասած` կա՜մ`տգետներ, կա´մ`կամակատարներ:

Հարկ է նշել, որ ՀՀ-ում և աշխարհի մեծ մասում առկա կրթական համակարգը չի ենթադրում մտածողություն, այլ ստիպում է բացառապես անգիր անել առկա տվյալները. ու այսպիսին է ցանկաված թեստային կրթական համակարգ. արդյունքում` յուրաքանչյուր տարի ՀՀ ԲՈւՀ-երն են ավարտում 50-100 ինքնուս-խելացիներ, 500-1000 տխմար վերլուծություններ անողներ և տասնյակ հազարավոր կամակատարներ, ումից կրթական համակարգը ընդամենը պահանջել է անգիր անել, որ հետո էլ իշխանությունների տված անգիրներն անգիր անեն` առանց վերլուծելու:

Անգիր անելով մարդիկ դառնում են տնտեսագետ, իրավաբան, դատավոր, հաշվապահ, գյուղատնտես, քիմիկոս, ու պրոցեսը գնում է հետ` պետությունը բոլոր ասպեկտներով հետընթաց է ապրում, որովհետև վերլուծողներ`նոր մտածողներ չկան, կան միայն կատարողներ: «Անասնաֆերմա»-ում էլ կենդանիներին վարժեցրել էին անընդհատ անգիր ասել, որ Ընկեր Նապոլեոնը միշտ ճիշտ է: Թեստային համակարգն ամենամեծ հանցագործությունն է երեխաների` իրական կրթություն ստանալու իրավունքի դեմ: