Մոսկվան հարցեր ունի պաշտոնական Երևանին՝ «ոչ կոռեկտ որոշման» հետ կապված
Ռուսաստանի նախագահի մամուլի քարտուղար Դմիտրի Պեսկովը «ոչ կոռեկտ որոշում» է որակել ՀՀ ԱԺ կողմից Հռոմի ստատուտի վավերացումը:
Ինչպես հաղորդում է ռուսական ՌԻԱ «Նովոստի» գործակալությունը, Դմիտրի Պեսկովը մասնավորապես նշել է. «Հայաստանի գործող իշխանությանն ուղղված լրացուցիչ հարցեր կծագեն: Այդ հարցերը նախապես փոխանցվել են հայկական կողմին: Մենք կասկածում ենք և ի սկզբանե էլ կասկածել ենք, որ երկկողմ հարաբերությունների տեսանկյունից, Միջազգային քրեական դատարանի Հռոմի ստատուտին Հայաստանի միանալը կոռեկտ կլինի: Առաջվա նման համարում ենք, որ դա ոչ կոռեկտ որոշում է»:
Անդրադառնալով Հայաստանի ԱԺ նշված որոշմանը, Դմիտրի Պեսկովը նաև նկատել է. «Չէինք ցանկանա, որ Պուտինը երբևէ ստիպված լիներ հրաժարվել Հայաստան այցելելուց»:
Հիշեցնենք, որ հոկտեմբերի 3-ի նիստում Հայաստանի ԱԺ-ն վավերացրեց Հռոմի ստատուտը, որին «կողմ» քվեարկեցին բացառապես փաշինյանական ՔՊ-ի ներկայացուցիչները, իսկ ընդդիմադիր պատգամավորները քվեարկեցին «դեմ»:
Հետևեք մեզ Facebook-ում