Փաշինյանի կառավարությունը հերթական վարկը կվերցնի. այս անգամ 12 միլիոն եվրո

Կառավարության հուլիսի 20-ի նիստի ժամանակ դրական եզրակացություն տրվեց նոր վարկային համաձայնագրի կնքմանը:

Հայաստանի Հանրապետության կառավարության և Գերմանիայի Դաշնային Հանրապետության կառավարության միջև նախատեսվում է ստորագրել 2022թ. ֆինանսական համագործակցության մասին համաձայնագիր:

Համաձայնագրով նախատեսվում է մինչև 12.000.000 (տասներկու միլիոն) եվրոյի ֆինանսական օժանդակություն (վարկ) տրամադրել «Վերականգնվող էներգիայի ընդլայնում և էներգախնայողություն․ փուլ III» ծրագրի իրականացման համար, նաև անհրաժեշտության դեպքում տրամադրել այնպիսի լրացուցիչ դրամաշնորհներ, որոնք պետք է ուղղվեն Համաձայնագրի 1-ին հոդվածում նշված ծրագրերի նախապատրաստմանը կամ անհրաժեշտ հարակից միջոցառումներին։

Համաձայնագրի 1-ին հոդվածում նշված գումարի օգտագործումը և այն պայմանները, որոնցով այդ գումարը տրամադրվում է, սահմանվում են Վերականգնման վարկերի բանկի (ՎՎԲ-KfW) և վարկեր ընդունողների միջև կնքվող պայմանագրերով, որոնք ենթարկվում են ԳԴՀ օրենսդրությանը։ Եթե նշված պայմանագրերը չեն կնքվում հատկացման հաջորդող հինգ տարիների ընթացքում, ապա 1-ին հոդվածով նշված գումարի հատկացումն անփոխարինաբար չեղարկվում է։ Այդ գումարի համար սահմանված ժամկետն ավարտվում է 2027թ․ հոկտեմբերի 13-ին։

Հայաստանի Հանրապետության կառավարությունը Վերականգնման վարկերի բանկին ազատում է ուղղակի հարկերից, որոնք ՀՀ-ում ենթակա են վճարման՝ կապված նախագծի 1-ին հոդվածում և 2-րդ հոդվածում նշված պայմանագրերի կնքման և իրականացման հետ։

Համաձայնագիրը հանդիսանում է շրջանակային, որի ներքո հետագայում նախատեսվում է առանձին ֆինանսավորման կամ վարկային համաձայնագրերի ստորագրում՝ ըստ վերոնշյալ ծրագրերի:

Աղբյուրը՝ yerevan.today