Միշուստինը հայտարարել է ԱՊՀ-ում փոխգործակցության ամրապնդման հարցում ՌԴ-ի շահագրգռվածության մասին
Ռուսաստանը շահագրգռված է Անկախ Պետությունների Համագործակցությունում (ԱՊՀ-ում) համագործակցության հետագա զարգացման հարցում: Ինչպես «Արմենպրես»-ը տեղեկանում է ТАСС գործակալությունից, այդ մասին հայտարարել է ՌԴ վարչապետ Միխայիլ Միշուստինը։
«Ռուսաստանն անկեղծորեն շահագրգռված է Անկախ Պետությունների Համագործակցությունում փոխգործակցության հետագա ամրապնդմամբ», - ասել է ՌԴ վարչապետը ԱՊՀ երկրների Կառավարությունների ղեկավարների խորհրդի նիստում։
«Մեր ժողովուրդներին միավորում է բազմադարյա պատմությունը, մեր ընդհանուր մշակութային ու քաղաքակրթական կոդը: Մենք կարողանում ենք աշխատել միասին, ամենադժվար իրավիճակներում գտնել փոխշահավետ լուծումներ», - ընդգծել է Միշուստինը։
Նա վստահ է, որ « նման գործընկերային ոգով կանցնի այսօրվա նիստը՝ եղբայրական Ղրղզստանի Հանրապետության նախագահությամբ»։
Ռուսաստանի Դաշնության վարչապետն ուշադրություն է հրավիրել այն փաստի վրա, որ ԱՊՀ-ի գոյության 30 տարիների ընթացքում ստեղծվել է «ամուր նորմատիվային-իրավական բազա առևտրատնտեսական և սոցիալ-հումանիտար ոլորտներում համագործակցության համար»։
«Մենք ուրախ ենք ձեզ ողջունելու Ռուսաստանի ամառային մայրաքաղաքում՝ հյուրընկալ Սոչիում», - դիմել է Միշուստինը պաշտոնակիցներին։
Ըստ ՌԴ վարչապետի՝ «առողջարանային քաղաքի յուրահատուկ մթնոլորտը կնպաստի կառուցողական և արդյունավետ շփմանը»:
ԱՊՀ երկրների Կառավարությունների ղեկավարների խորհրդի նիստին է մասնակցում նաև Նիկոլ Փաշինյանը:
Հետևեք մեզ Facebook-ում
