Սահմանադրական հանձնաժողովի անդամի վարձատրությունը, ամսական, 976 հազար դրամ է. կառավարությունը կփոխհատուցի

Կառավարությունն իր այսօրվա՝ ապրիլի 27-ի նիստում որոշեց ԵՄ-ից ստացված «Աջակցություն Հայաստանում դատական ոլորտի բարեփոխումների իրականացմանը» դրամաշնորհային ծրագրի 2023 թվականի հունվարի 1-ի դրությամբ չօգտագործված մնացորդի հաշվին փոխհատուցել Սահմանադրական բարեփոխումների մասնագիտական հանձնաժողովի անդամների վարձատրության հետ կապված ծախսերը:

Հանձնաժողովի կազմում ներգրավված է եղել 5 անդամ: Նրանց վարձատրությունն ապահովվել է ՀՀ արդարադատության նախարարության կողմից։

Վարձատրության չափը յուրաքանչյուր անդամի համար կազմելու է 976 հազար 429 դրամ՝ յուրաքանչյուր ամսվա համար։

Հանձնաժողովի անդամների վարձատրությունը ամբողջությամբ նախատեսվում է կազմակերպել Հիմնադրամին սույն որոշմամբ տրամադրվելիք դրամաշնորհային միջոցների հաշվին՝ 976.429*5*10=48.821.450 դրամի չափով` 2023 թվականի մարտ-դեկտեմբեր ամիսների համար:

Ներկայումս բանակցություններ են ընթանում ՄԱԿ Զարգացման ծրագրի հետ՝ այս մասով ծրագիրը երկարաձգելու և համաֆինանսավորում իրականացնելու համար, սակայն քանի որ դեռևս առկա չէ ծրագիրը երկարաձգելու մասին որոշում, ուստի Հանձնաժողովի վարձատրության ապահովումը հաշվարկվել է ամբողջի մասով: Ընդամենը նախագծով նախատեսվել է հատկացնել 58 մլն 585 հազար դրամ: