Իրանն առաջիկայում պատասխան պատժամիջոցներ կմտցնի Եվրամիության դեմ. ԱԳՆ

Իրանի Իսլամական Հանրապետությունն առաջիկայում պատասխան պատժամիջոցներ կմտցնի Եվրամիության դեմ։ Այս մասին տեղեկացրել է Իրանի Իսլամական Հանրապետության ԱԳՆ-ի ներկայացուցիչ Նասեր Քանաանին, տեղեկացրել է IRNA-ն։

Փետրվարի 20-ին ԵՄ-ն ընդլայնել է Իրանի դեմ պատժամիջոցները՝ «բողոքները ճնշելու» պատճառով, սեւ ցուցակ մտցնելով եւս 32 ֆիզիկական եւ 2 իրավաբանական անձանց։ Սեւ ցուցակ մտցված ֆիզիկական անձանց մեջ են պաշտոնյաներ, ուժայիններ, դատական եւ քրեակատարողական համակարգերի աշխատողներ, այդ թվում մշակույթի եւ իսլամական կողմնորոշման նախարար Մոհամադ Մեհդի Էսմայիլին եւ կրթության նախարար Յուսեֆ Նուրին։ Պատժամիջոցների ենթարկված իրավաբանական անձանց մեջ են ոստիկանության եւ անվտանգության ուժերի հետ կապված կառույցները։

Ինչպես փետրվարի 15-ին տեղեկացրել է Եվրահանձնաժողովի ղեկավար Ուրսուլա ֆոն դեր Լյայենը, Եվրամիությունը մտադիր է նաեւ փետրվարի 24-ին պատժամիջոցների առանձին բլոկ մտցնել Իրանի դեմ՝ հակառուսական պատժամիջոցների տասներորդ փաթեթի շրջանակում։ Դրա մեջ կմտնեն իրավաբանական եւ ֆիզիկական անձինք, որոնք, ԵՄ-ի կարծիքով, կապ ունեն Ռուսաստան իրանական ռազմական մատակարարումների հետ։

Թեհրանը քանիցս նախազգուշացրել է Արեւմուտքին իր ինտերվենցիոն վարքագծի հետեւանքների մասին՝ նշելով, որ այդ միջոցներն անպատասխան չեն մնա։

Աղբյուր՝ News.am