Քաշաթաղցիներին առաջարկվել է սահմանամերձ գյուղերում տուն գնել կամ էլ կառուցապատել՝ 14 եւ 16 մլն դրամ վարկով

Քաշաթաղի բնակիչներին, որոնք արցախյան առաջին պատերազմից հետո տեղափոխվել են Արցախ, իսկ 44–օրյա պատերազմից հետո էլ տեղահանվել ու բնակություն են հաստատել Հայաստանում, Կառավարությունից նախօրեին տեղեկացրել են, որ առաջիկա երկու օրերին կզանգահարեն ու կպայմանավորվեն հանդիպման համար, սակայն, թե ում հետ կհանդիպեն քաշաթաղցիները՝ դեռ հայտնի չէ։ Այս մասին NEWS.am-ի հետ զրույցում ասաց Բերձորի նախկին բնակիչ Կարինե Մովսեսյանը։

Բայց մինչ Կառավարությունից որեւէ մեկի հետ հանդիպելը, քաշաթաղցիներին նախօրեին ընդունել է Աշխատանքի եւ սոցիալական հարցերի փոխնախարար Դավիթ Խաչատրյանը եւ Կառավարության նոր առաջարկները ներկայացրել։

«Խոսքը Հայաստանի սահմանամերձ գյուղերում հիպոտեկային վարկով տուն գնելու նպատակով մինչեւ 14 մլն դրամ, իսկ սահմանամերձ գյուղերում հիպոտեկային վարկով կառուցապատման համար մինչեւ 16 մլն դրամ տրամադրվելիք գումարի մասին է։  Սահմանամերձ գյուղերում տուն գնելու կամ  կառուցապատելու դեպքում կանխավճարը 1 տոկոս է, ինչը համեմատ Կառավարության մյուս ծրագրերի, շատ լավ է։

Կարծում եմ հատուկ են այս առաջարկները արել, որ մարդիկ գնան սահմանամերձ գյուղերում ապրեն, եթե Երեւանում կամ մարզերում Կառավարության ծրագրով չեն կարողանում բնակարան ձեռքբերել։ Մարդիկ, իհարկե, կլինեն, որոնք կնախընտրեն այդ առաջարկները։ Օրինակ, եթե ես վստահ լինեի, որ սահմանամերձ գյուղերի սահմանները չեն փոխվի, հաճույքով կապրեի այնտեղ, բայց այդ վստահությունը չունեմ, հետո այնտեղ աշխատատեղերի խնդիր կա»,– NEWS.am-ի հետ զրույցում ասաց քաշաթաղցի Կարինե Մովսեսյանը, որը ներկա է եղել փոխնախարարի հետ հանդիպմանը։

Հայաստանից Արցախում վերաբնակեցվածների համար, Կառավարությունն ըստ Կարինե Մովսեսյանի, առաջարկում է Երեւանում բնակարան գնելու համար տրամադրել 8 մլն դրամ, իսկ մարզերի դեպքում՝ 10 մլն դրամ վարկ։ Քաշաթաղցիները պահանջում են վերանայել այս ծրագիրը, քանի որ շատերը չեն կարողանում օգտվել դրանից։

«Կան կանոններ, որոնք բանկը չի կարող խախտել։ Օրինակ, եթե անձն ուզում է տուն գնել, գնահատող է գալիս, որը կարող է տան գինը քիչ գնահատել։ Ես չեմ ասում, թե իրենք ոչ ռեալ են գնահատում, բայց իրենց գնահատածն ու վաճառքի գինը շատ ժամանակ չի համընկնում։ Գրեթե երկու տարվա մեջ շատ քիչ մարդկանց է հաջողվել տուն գնել։ Այս ծրագրից օգտվելու մեկ խոչընդոտ էլ կա. եթե մինչեւ պատերազմը  վերցրած վարկեր ունենք Արցախում, որը չենք մարել, ապա սերտիֆիկատով գործարքը չի բավարարվում։ Պետք է զրոյացվի այդ վարկը, որ բանկը գործարք կատարի։ Սերտիֆիկատներն էլ տրվել են ընդամենը 15 ընտանիքի։ Եթե ես ստանամ էլ այդ սերտիֆիկատը, ես 200 000 դրամ վարկ ունեմ, որը չեմ կարողանում մարել, Երեւանում վարձով եմ բնակվում։ 

Բայց անգամ եթե ես վարկ էլ չունենամ, բնակարան գնելը հեշտ չէ, որովհետեւ 8 կամ 10 միլիոն դրամով տուն գտնելը աբսուրդի ժանրից է, գնային այդ սահմանում միայն փլատակներ են վաճառվում։ Բացի այդ կանխավճարի չափն էլ քիչ չէ, մարզերում բնակարան գնելու համար հինգ տոկոս է, իսկ Երեւանում՝ տասը։ Եթե կանխավճարը չվճարվի, հիպոտեկային վարկը չի ձեւակերպվի։ Նույնիսկ մարդիկ  ասել են՝ կլինի՞ սերտիֆիկատի արժեքի մեջից հանեք էդ գինը, մերժել են, պահանջել են կանխավճար։

Մանրամասները՝ NEWS.am-ում