Թող Ծիծեռնակաբերդից հար դեպ Երկինք բարձրանա Հայոց ուխտի անուշ խունկը, և Սարդարապատից թող հավետ շողա Հայոց սուրը՝ իր արդարության լույսով կուրացնելով մեր թշնամիներին

Երկնքից մեզ են նայում մեր սուրբ նահատակները և մեր Մեծերը՝ բոլորված Արարիչ Աստծո շուրջ:

Հայոց անմեղ արյան հատուցումը տակավին չի տրվել, չարը տակավին չի պատժվել և խորտակվել. դեռ արդար հատուցման Գողգոթան չի հաղթահարվել:

Հրաշք Սարդարապատով Հայասեր Աստված հարություն տվեց Հայությանը և Պետության վերականգնումով հիմքը դրեց հույսի, լույսի և հզոր Հայաստանի: Եվ վերածաղկեց Փոքրիկ Հայաստանը՝ որպես առհավատչյա Մեծ և Միացյալ Հայաստանի: Եվ կոթողվեցին Արարատյան մայր հողին Ցեղասպանության և Սարդարապատի հուշակոթողները՝ որպես աստվածային սուրբ նշաններ մեզ համար և մեր հին ու նոր թշնամյաց համար:

Այո, ճշմարիտ է մեր Տիրոջ խոսքը՝ «սուր վերցնողը սրից էլ կընկնի». սրատեցին մեզ մեր բնօրրանում և մեր արդար ու հզոր սրով խորտակվեցին: Այսպես է լինելու ցկատարած աշխարհի: Եվ այս քաջ գիտեն մեր թշնամիք, գիտեն, որ ի վերջո ծնկի են գալու Աստծո ժողովրդի առջև. արշալույսն այդ երկունքի մեջ է:

Միայն մենք պետք է գիտակցենք, թե ով ենք և ինչ կոչում ունենք, և ինչպես պետք է ապրենք ու վարենք մեր կյանքը, որպեսզի ողջունենք այդ Սուրբ Արշալույսը:

Կերտվենք և կերտենք ՀԱՅԻ ազնվական տեսակը, որը դրոշմված կլինի Հայոց սրբալույս Մյուռոնով և հառաջ կընթանա ճշմարտության ճանապարհով վասն հավատո և վասն Հայրենյաց:

Թող Ծիծեռնակաբերդից հար դեպ Երկինք բարձրանա Հայոց ուխտի անուշ խունկը, և Սարդարապատից թող հավետ շողա Հայոց սուրը՝ իր արդարության լույսով կուրացնելով մեր թշնամիներին:

«Տէր, կեցո Դու զհայս, եւ արա զնոսա պայծառս». եղիցի, եղիցի:

Ասողիկ աբեղա

Հայր Ասողիկ Կարապետյանի ֆեյսբուքյան էջից