Թուրքամետների մի հերթական մանիպուլիացիայի մասին կամ ինչու են դեռ սատարում ն.փ.-ին. Լուսանկար

Ինչպես հիշում եք, փետրվարի սկզբին հրապարակվեցին Հայաստանում և Թուրքիայում անցկացված հանրային կարծիքի բավական մանրամասն հարցումներ, որոնք հստակ ցույց տվեցին, որ ո՛չ Հայաստանում, ո՛չ առավել ևս Թուրքիայում «խաղաղության դարաշրջանի» օրակարգ գոյություն չունի (հարցման մասին իմ գրառումը՝ https://www.facebook.com/varuzhandragoman/posts/603560161043184)։ Հիշեցնեմ, որ Հայաստանում անցկացված հարցումը ցույց էր տվել, որ հայաստանցիների միայն 29%-ն է կարծում, որ Թուրքիայի հետ պետք է հաստատվեն առանց նախապայմանների հարաբերություններ։ Հարցվածների շուրջ կեսը (47%) գտնում էր, որ Թուրքիայի հետ պետք է սկսել երկխոսությունը, սակայն Հայոց ցեղասպանության ճանաչման հարցը պետք է մնա մեր օրակարգում։ Իսկ 48%-ը նաև կարծում է, որ Հայաստանը պետք է առաջադրի իր նախապայմանները (օր.՝ Արցախի հարցում)։

 

Այս հարցումները ՀՀ դե ֆակտո իշխանության համատարած կեղծ խաղաղասիրության ֆոնին տհաճ անակնկալ էին, ուստի պետք էր որևէ ձև կոծկել հարցման արդյունքները։ Կապիտուլիանտները որոշեցին պարզապես ստել և ասել, որ «Հայաստանցիների 70 տոկոսը կողմ է Թուրքիայի հետ հարաբերությունների հաստատմանը»։ Հենց այպիսի վերնագրով նյութը հայտնվեց «Հայկական ժամանակ» տխրահռչակ թերթում՝ բնականաբար առանց նշելու, որ հարցվածները կողմ են հարաբերություններին միայն հայկական խիստ որոշակի պայմաններով (նյութի հղումը մեկնաբանություններում)։ Դրանից անմիջապես հետո իշխանական ողջ մեդիակայսրությունը սկսեց տարածել հենց այս մի նախադասությունը, որը, ինչպես տեսանք, ամբողջությամբ մանիպուլիացիա է և կեղծ։ Նպատակը մեկն էր՝ ստեղծել պատրանք, որ ՀՀ բնակչության մեծամասնությունը սատարում է թուրքամետների հակահայկական օրակարգը։ Դրանից հետո ես բազմաթիվ տեղերում հանդիպել եմ հղում այս կեղծ նախադասությանը։ Այն բավական տարածում է գտել։

 

Բայց սրանով պատմությունը չի ավարտվում։

 

Անցավ ավելի քան մեկ ամիս և ՀՀ դե ֆակտո արտգործնախարար ա. միրզոյանը Թուրքիա այցելությունից հետո մի հարցազրույց է տալիս Թուրքիայի պետական «Անադոլու» գործակալությանը։ Հարցազրույցի մեխը արտացոլված է հետևյալ վերնագրում. «Ըստ ՀՀ ԱԳ նախարարի՝ Հայաստանի բնակչությունը ուզում է կարգավորել հարաբերությունները Թուրքիայի հետ» (տե՛ս կից նկարը, հղումը՝ մեկնաբանություններում)։ Բուն հարցազրույցում միրզոյանը պնդում է, որ «հանրային կարծիքի հարցումները նույնպես արտացոլում են հանրային աջակցությունը կարգավորման գործընթացին»։ Սա հենց այն նույն հարցումն է, որը մենք քննարկեցինք այս գրառման մեջ։ Առնվազն որևէ այլ հարցում հանրային տիրույթում առկա չէ։ Ու ինչպես տեսնում եք, պետական պաշտոնյան իր խոսքում հղում է տալիս կեղծ փաստի։

 

Այս մանիպուլիացիան ընդամենը մեկն է այն բազմահազար նմանատիպ քայլերից, որ ամենօրյա ռեժիմով ստեղծում ու տարածում է կապիտուլիանտի խմբավորումը։ Հենց այս հետևողական աշխատանքն է պատճառը (և դրան համարժեք հակաքարոզչության բացակայության), որ մեր հանրության մի զգալի մասը դեռ սատարում է տվյալ հակահայկական իշխանությանը։