Աղվան Հովսեփյանը ծանր վիճակով տեղափոխվել է հիվանդանոց

Քննչական կոմիտեի նախկին նախագահ, նախկին գլխավոր դատախազ Աղվան Հովսեփյանը տեղափոխվել է հիվանդանոց։ Այս մասին oragir.news-ին հայտնեց նրա պաշտպաններից Սասուն Ռաֆայելյանը։

Փաստաբանը նշեց` իր պաշտպանյալը ուրբաթ օրը տեղափոխվել է Միքայելյան հիվանդանոց` բժշկի խիստ ցուցումով։ Ռաֆայելյանը նաեւ նշեց, որ Հովսեփյանի առողջական վիճակը ծանր է։ Ի դեպ, այսօր Հովսեփյանի պաշտպանական խումբը հայտարարություն էր տարածել, որ Աղվան Հովսեփյանի կալանքը երկու ամսով երկարաձգվել է եւ նրան նոր մեղադրանք է առաջադրվել։ Փաստաբանն անդրադառնալով հարցին, թե ի՞նչ նոր մեղադրանք է առաջադրվել, պատասխանեց` Քրեական օրենսգրքի 38֊308 հոդվածով, այսինքն` պաշտոնեական լիազորությունների չարաշահում դրդելը։ Հարցին, թե ո՞ւմ է Հովսեփյանը դրդել պաշտոնեական լիազորությունների չարաշահում կատարել, ասաց` այս պահին մանրամասներ չի կարող հայտնել։

Պաշտոնական հաղորդագրության համաձայն՝ Ա. Հովսեփյանին մեղադրանք է առաջադրվել նաեւ հանցավոր ճանապարհով ստացված առանձնապես խոշոր չափերով` ընդհանուր 1.299.404.414 ՀՀ դրամ գույքը (փողերի լվացում) օրինականացնելու համար՝ մի քանի դրվագներով: Ըստ հաղորդագրության՝ փաստացի մասնակցել է ձեռնարկատիրական գործունեություն իրականացնող մի շարք ՍՊ ընկերությունների կառավարմանը, բացի այդ, ստացել է առանձնապես խոշոր չափերով` 190.000.000 ՀՀ դրամ կաշառք եւ խարդախության եղանակով կատարել առանձնապես խոշոր չափերով` 800.000.000 ՀՀ դրամ գույքի հափշտակություն: 

Աղբյուր՝ oragir.news