Դատարանը որոշեց. Ստյոպա Սաֆարյանը պետք է ներողություն խնդրի Սաթիկ Սեյրանյանից

Հանրային խորհրդի նախագահն ի պաշտոնե, ըստ օրենքի, պարտավոր է քաղաքական չեզոքություն դրսեւորել, սակայն ՀԽ նախկին նախագահ Ստյոպա Սաֆարյանն աչքի էր ընկնում ոչ միայն իր իշխանական հայացքներով, այլեւ՝ հանրային տրամադրություններն առավել թեժացնելու, կրակի վրա «բենզին լցնելու» սովորությունով։ Պարզվում է՝ Սաֆարյանի դեմ ոչ միայն դատական հայցեր են ներկայացնում հասարակական-քաղաքական գործիչներն, այլեւ՝ խմբագիրները։

Hraparak.am-ը տեղեկացավ, որ «168 Ժամ»-ը և գլխավոր խմբագիր Սաթիկ Սեյրանյանը հայց են ներկայացրել դատարան՝ Ստյոպա Սաֆարյանի դեմ: Հայցը վերաբերում է պատիվն ու արժանապատվությունը, ՍՊԸ-ի գործարար համբավն արատավորող և զրպարտություն հանդիսացող տվյալները հրապարակայնորեն հերքելուն, ներողություն խնդրելուն պարտավորեցնելու, ինչպես նաև 2 մլն դրամ՝ որպես զրպարտության և 1 մլն դրամ՝ որպես վիրավորանքի համար փոխհատուցում բռնագանձելու պահանջներով։

2020-ի հոկտեմբերի 13-ին Սաֆարյանը Սեյրանյանին պատկանող 168․am կայքն անվանել է հայ հանրությանն իր անբարոյականությամբ հայտնի կայք, զուտ այն բանի համար, որ կայքը հրապարակել է «Վլադիմիր Սոլովյովի արձագանքը՝ Ստյոպա Սաֆարյանի գրառմանը» վերնագրով հոդվածը։ Ստյոպա Սաֆարյանը հակընդդեմ հայց է ներկայացրել, որը դատարանը հետ է վերադարձրել։ Մենք տեղեկացանք, որ դատարանը բավարարել է հայցը` մասնակիորեն, պարտավորեցնելով Ստյոպա Սաֆարյանին հրապարակային ներողություն խնդրել, նաև որպես դրամական փոխհատուցում վճարել 260 հազար դրամ զրպարտության եւ վիրավորանքի համար։  

Ստյոպա Սաֆարյանը վերաքննիչ բողոք է ներկայացրել, որը դատարանի կողմից մերժվել է։ Լրատվամիջոցի շահերի ներկայացուցիչ Արամազդ Կիվիրյանը «Հրապարակի» հետ զրույցում նշեց, որ դատարանը Սաֆարյանի գրառումը դիտարկել է որպես զրպարտություն եւ մասնակիորեն բավարարել է իրենց հայցը:

Մանրամասները՝ Hraparak.am-ում: