Իրանն «Օմիկրոնի» պատճառով փակում է ցամաքային սահմանը ՀՀ–ի և մյուս հարևան երկրների հետ

Իրանի իշխանությունները 15 օրով փակում են հարևան երկրների հետ ցամաքային սահմանը՝ կորոնավիրուսի «Օմիկրոն» մանրէահիմքի տարածման սպառնալիքի պատճառով, Իրանի մաքսային ծառայության պաշտոնական ներկայացուցիչ Սեյեդ Ռուհոլլա Լաթիֆիի խոսքը մեջբերում է ТАСС-ը:

«Կորոնավիրուսի տարածման դեմ պայքարի ազգային շտաբի և Ներքին գործերի նախարարության կարգադրությամբ «Օմիկրոն» մանրէահիմքի տարածումը կանխելու նպատակով հարևան երկրների հետ ցամաքային սահմանը ուղևորների համար այսօրվանից փակ կլինի 15 օրով»,-Լաթիֆիի խոսքերը մեջբերում է ԻԼՆԱ գործակալությունը։

Պաշտոնյան հստակեցրել է, որ խոսքը Թուրքիայի, Իրաքի, Աֆղանստանի, Ադրբեջանի, Պակիստանի և Հայաստանի մասին է։

«Ինչ վերաբերում է Թուրքմենստանին, ապա այդ երկրի հետ ցամաքային սահմանով ուղևորահոսք չկա կորոնավիրուսի համավարակի սկզբից ի վեր»,-հավելել է նա:

Առողջապահության համաշխարհային կազմակերպութունը Աֆրիկայի հարավում հայտնաբերված կորոնավիրուսի В.1.1.529 մանրէահիմքը նոյեմբերի 26-ին նշանակել է հունական «օմիկրոն» տառով։

ԱՀԿ-ի հայտարարության մեջ ասվում էր, որ այդ տարատեսակը «մեծ թվով մուտացիաներ ունի, որոնց մի մասը անհանգստություն են առաջացնում»։