Կիևը, կարծես, պատրաստվում է Դոնբասի հակամարտության ուժային լուծմանը. Զախարովա

Ուկրաինայի իշխանությունները, 20 տոկոսով ավելացնելով պաշտպանական բյուջեն, կարծես, պատրաստվում են Դոնբասի հակամարտության ուժային լուծմանը: Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Արդեն 8-րդ տարին շարունակվող քաղաքացիական պատերազմին վերջ դնելու փոխարեն Կիևը, կարծես թե, պատրաստվում է Դոնբասի խնդրի ուժային լուծմանը, ինչպես իրենք են այն անվանում։ Գերագույն ռադայում Ուկրաինայի վարչապետ Դենիս Շմիգալը հայտարարել է, որ հաջորդ տարի երկրի ռազմական բյուջեն կավելանա մինչև գրեթե 12 մլրդ դոլար:

Դա 12 մլրդ դոլար է իր քաղաքացիների հետ պատերազմի համար, այն մարդկանց, որոնց մասին այդքան հաճախ են խոսում ու մտածում միայն այն ժամանակ, երբ ստորագրում են ռազմական բյուջեները։ 20 տոկոսով ավելացել է Ուկրաինայի ռազմական բյուջեն»,- նկատել է Զախարովան։

Դիվանագետի խոսքերով՝ Ռուսաստանն ափսոսում է, որ ՆԱՏՕ-ի երկրները լիովին աջակցում են պաշտոնական Կիևին սեփական բնակչության դեմ «խաչակրաց արշավանքում»:

Զախարովայի խոսքերով՝ Դոնբասում կողմերի շփման գծում իրադրությունը շարունակում է դեգրադացվել, ԵԱՀԿ առաքելությունն անցած երկու շաբաթվա ընթացքում այնտեղ հինգ անգամ ավելի շատ հրադադարի ռեժիմի խախտումներ է արձանագրել, քան մեկ տարի առաջ:

Ուկրաինայում գտնվող արտասահմանցի զինծառայողները հակամարտության ուղղակի հրահրմամբ են զբաղվում և ղեկավարում են ծավալվող ռազմական իրադարձությունները, հայտարարել է Զախարովան:

«Այս բոլոր խոսքերն այն մասին, որ արտասահմանցի զինծառայողները, որոնք մասնակցում են ազգային անվտանգության և պաշտպանության ապահովման միջոցառումներին և ռուսական ռազմական ագրեսիայի զսպմանը, սուտ են։ Այդ հրահանգիչներն ուղղակի հրահրմամբ են զբաղվում և ուղղակիորեն ղեկավարում այն իրադարձությունները, որոնք ծավալվում են մեր աչքի առաջ։ Բացի դրանից՝ վերջերս հենց այդ հրահանգիչները իրավունք են ստացել ձեռք բերել Ուկրաինայի քաղաքացիություն պարզեցված կարգով։ Դրանք երկակի ստանդարտներ չեն, դա ինչ-որ սրբապղծություն է»,- ասել է Զախարովան։