Կոշտ պատասխան կտանք Իրանի դեմ ուղղված ցանկացած արկածախնդիր քայլի. Գեներալ Հաջիզադե

ԻՀՊԿ օդուժի հրամանատար Սարդար Ամիր Ալի Հաջիզադեն հայտարարել է, որ կոշտ կպատասխանեն ցանկացած ռեժիմի կամ խմբի կողմից Իրանի դեմ ուղղված ցանկացած արկածախնդիր քայլի: Այս մասին գրում է Pars Today-ը։

«Մենք կարծում ենք, որ տարածաշրջանի երկրները կարող են տարածաշրջանում խաղաղություն, անվտանգություն և բարեկամություն հաստատել համատեղ ջանքերով և առանց օտարերկրացիների և չարամիտների թույլտվության: Իրանի թշնամիները մեզ մեղադրում են իշխանության և միլիտարիզմի ձգտման մեջ, մինչդեռ մենք դա չենք ցանկանում, քանի որ փորձը ցույց է տվել, որ խաղաղությունն ու անվտանգությունը պահպանելու համար պետք է ուժեղ լինել», - ասաց նա:

Նա նաև հավելեց, որ. «Մենք եղել ենք, կմնանք և կլինենք այս տարածաշրջանում ճնշվածների կողքին, հատկապես Պաղեստինում: Այս առումով մենք կշարունակենք ինքնաբավության ու ամրապնդման ուղին՝ հաշվի առնելով իսլամից և պատմությունից քաղած դասերը»։ 

Սարդար Ամիր Ալի Հաջիզադեն, ԻՀՊԿ օդուժի ավիատիեզերական ցուցահանդես այցելած օտարերկրյա դեսպանատների ռազմական կցորդների հետ հանդիպման ժամանակ նշել է, թե ԱՄՆ-ը չի կարող դիմակայել Իրանի, Չինաստանի, Ռուսաստանի և աշխարհի ազատ երկրներին և քայքայվում է ներսից:

«Իրանի դեմ ուղղված ԱՄՆ-ի տնտեսական պատժամիջոցները խոչընդոտում են որոշ հիվանդությունների բուժման համար անհրաժեշտ դեղերին ԻԻՀ հասանելիությանը»,-ասել է նա։

ԻՀՊԿ օդուժի հրամանատարը հավելել է, որ այսօր բոլորի համար պարզ է, որ եթե չլիներ գեներալ Սոլեյմանիի պայքարը, բացի տարածաշրջանում ահաբեկիչների ներկայությունից, նրանք կտղափոխվեին նաև Եվրոպա և տարածաշրջանի այլ երկրներ:

«Իհարկե, Իրանը շարունակելու է նահատակ Սոլեյմանիի սպանության հեղինակներին պատասխանատվության ենթարկելուն ուղղված ջանքերը և նրանք չեն խուսափելու պատասխանատվությունից։ Իրանի ժողովուրդը դիմակայել է ԱՄՆ-ի ու նրա դաշնակիցների առավելագույն ճնշմանն ու պատժամիջոցներին և հաղթել է այդ պայքարում»,-ասել է գեներալ Հաջիզադեն։

Zham.am