Ադրբեջանական մամուլը հրճվանք է ապրում Ալեն Սիմոնյանի պահվածքի առիթով. Տեսանյութ

Ինչպես գիտեք, Ադրբեջանում շատ դժգոհ են Հայաստանի օմբուդսմեն Արման Թաթոյանի գործունեությունից, ընդհանրապես, միջազգային կառույցներում հայ իրավապաշտպանների գործունեությունը շատ լուրջ վնաս է հասցրել պաշտոնական Բաքվի իմիջին: Արման Թաթոյանի և այլ իրավապաշտպանների վերջին ասուլիսը հայ գերիների վիճակի վերաբերյալ մտահոգություն է առաջացրել ադրբեջանցիների մոտ, որ նման տեղեկատվություններով զինված հայկական կողմը գործելու է բոլոր միջազգային կառույցներում՝ փորձելով ճնշում գործադրել Ադրբեջանի վրա: Սակայն Ալեն Սիմոնյանի վերջին «բլթոցը» ընդդեմ Աննա Մկրտչյանի, երբ նա տեղեկատվությունները հայ գերիների մասին բառացիորեն անվանեց «հորինված սցենարներ», անհավանական հրճվանք պատճառեց ադրբեջանցիներին:

Փաստորեն, ադրբեջանցիները՝ ի դեմս Ալեն Սիմոնյանի, Հայաստանի քաղաքական դաշտում գտան մեկ մարդու, ով հիմնավորում է ադրբեջանցիների պնդումները, թե հայ գերիների խոշտանգումների մասին Արման Թաթոյանի խոսքերը «հորինված սցենարներ» են:

Ավելին, ադրբեջանցի փորձագետներն առաջարկում են, որ միջազգային ատյաններում Ադրբեջանի ներկայացուցիչները հակադրեն հայ իրավապաշտպանների փաստարկներին Ալեն Սիմոնյանի խոսքերը: Փաստացի, ադրբեջանցիները, ովքեր հայ գերիներին «քաղաքական խաղադրույքի» վերածեցին, այսուհետ Ալեն Սիոմնյանի օգնությամբ պաշտպանվելու են միջազգային կառույցներում՝ չմոռանալով հույս հայտնել, որ Հայաստանի ԱԺ-ի ղեկավարի պաշտոնը զբաղեցնող անձի դիտողությունը հույս է առաջարկում է, որ հայ հասարակությանը կարելի է հարմարեցնել Ադրբեջանի ցանկացած պահանջի և նույնիսկ հայ գերիների թեման շահարկել:

Պետք է ասել, որ ոչ միայն վերջին 30, այլեւ հայ ժողովրդի գոյության վերջին 100 տարում նման խայտառակ երեւույթ չի արձանագրվել: Իհարկե, Ալեն Սիմոնյանի պահվածքը ոչ մի կապ չունի հասարակական կարծիքի հետ, բայց «սիմոնյանների» նկատմամբ համբերությունը հուշում է, թե որքան հիվանդ է հայ հասարակությունը, և Հայաստանի մյուս քաղաքական շրջանակները հավասարապես մեղավոր են այս հարցում:

Սա՛ է իրականությունը։

Դավիթ Մկրտչյան