Ալեն Սիմոնյանի «բլթոցը» բացահայտեց Նիկոլ Փաշինյանի իրական վերաբերմունքը Արման Թաթոյանի նկատմամբ. Տեսանյութ

«Պատիվ ունեմ» խմբակցության անդամ Աննա Մկրտչյանի երեկվա ելույթը հիմնականում նվիրված էր ՀՀ Մարդու իրավունքների պաշտպան Արման Թաթոյանի զեկույցում պարունակվող այն տեղեկատվությանը, որը վերաբերվում էր այժմ Բաքվում գտնվող հայ գերիներին:

Նշենք, որ օրեր առաջ հայ գերիների նկատմամբ դաժան վերաբերմունքի մասին Արման Թաթոյանի եւ այլ իրավապաշտպանների համատեղ զեկույցը շոկ առաջացրեց հայ հասարակության շրջանում: Սակայն, ինչպես պարզվում է, այս զեկույցը շատ նյարդայնացրել է Նիկոլ Փաշինյանին:

Իշխանությունը վաղուց է «սրել իր ատամները» Արման Թաթոյանի դեմ, սակայն այն ռիսկի չի դիմում կոշտ քայլերի գնալ՝ հաշվի առնելով Թաթոյանի գործունեության առանձնահատկությունները, հատկապես՝ կապված Բաքվում հայ ռազմագերիների խնդիրների և հայ-ադրբեջանական նոր սահմանի հաստատման հետևանքով առաջացած մարդու իրավունքների խախտումների վերաբերյալ ՄԻՊ Թաթոյանի գնահատականների հանգամանքով պայմանավորված:

Հարկ է նշել, որ Թաթոյանի գործունեությունից շատ դժգոհ են նաև Ադրբեջանում, և հենց այս փաստն է խանգարում Փաշինյանին կոշտ քայլեր անել Թաթոյանի դեմ, և արդյունքում ստեղծվել է մի իրավիճակ, երբ Փաշինյանը և նրա թիմը ցանկանում են վերջապես «լուծել Թաթոյանի խնդիրը», բայց անհանգստացած են հասարակության լուրջ արձագանքից:

Հատկանշական է, որ մոտ մեկ ամիս առաջ իշխանությունները որոշեցին կոշտ քայլեր ձեռնարկել Թաթոյանի դեմ արդեն Ազգային ժողովում, սակայն վերջին պահին Փաշինյանը «ստոպ» տվեց այս գործընթացը: Այնուամենայնիվ, այս իրավիճակում ամենահետաքրքիրն այն է, որ նույնիսկ այս դեպքում «Քաղաքացիական պայմանագիր» խմբակցության անդամ Մարիա Կարապետյանը հրապարակայնորեն սկսեց մեղադրել Թաթոյանին տարբեր «մեղքերի» մեջ, ինչը ևս մեկ անգամ ապացուցեց, թե ով է Մարիա Կարապետյանը, ում համար ավելի մեծ արժեք կա, քան Փաշինյանի «վետոն»:

Սակայն, այս ամենը թողնենք մի կողմ, Ալեն Սիմոնյանի երեկվա «բլթոցը» Արման Թաթոյանի դեմ՝ ի ցույց է դնում այն ատելության մթնոլորտը, որը իշխանությունների մոտ առաջացել է ՄԻՊ-ի նկատմամբ: Իհարկե, դրանից հետո Սիմոնյանի մամուլի քարտուղարը փորձեց խմբագրել կատարվածը՝ նշելով, որ Ալենի խոսքերը վերաբերում էին ոչ թե Արման Թաթոյանի զեկույցին, այլ Աննա Մկրտչյանի պահվածքին, բայց բոլորի համար պարզ է, որ Սիմոնյանը պարզապես «դուրս տվեց» այս արտահայտությունը, ու հետո միայն հասկացավ, որ սխալվել է:

Այս ամենը ցույց է տալիս, թե ինչ բարոյահոգեբանական մթնոլորտ է տիրում իշխանությունում, որտեղ հստակ երևում է, որ այս իշխանության համար Բաքվում պահվող հայ գերիները գլխացավանք են, այլ ոչ թե մտահոգության առարկա: Այս մարդկանց վերջնական նպատակը բոլորովին այլ է եւ ոչ մի կապ չունի Հայաստանի քաղաքացու եւ հայկական պետության շահերի հետ:

Սա՛ է իրականությունը։

Դավիթ Մկրտչյան