Մարդկանց պատվաստվել հարկադրելը ոտքից գլուխ հակասահմանադրական է. Տեսանյութ

Տեղյակ եմ, որ կան նաև այլ հարթակներ: Այս նախաձեռնություններն ի վերջո նպաստելու են, որպեսզի քաղաքացին օբյեկտիվ տեղեկատվություն ստանա:

Կցանկանամ անդրադառնալ իրավական մի քանի խնդրի:

Կորոնավիրուսի կանխարգելման համար չեն կարող հարկադրանքով պատվաստել մեզ, առնվազն 2 պատճառով՝

1. Սահմանադրության 25-րդ հոդվածը չի թույլատրում բժշկական փորձի ենթարկել մարդուն առանց իր համաձայնության, իսկ այս փուլում լիարժեք չփորձարկված պատվաստանյութերի կիրառումը մարդկանց նկատմամբ բժշկական փորձի դասական օրինակ է.

2. Սահմանադրության 78-րդ հոդվածը սահմանում է համաչափության սկզբունքը: Ինչ է սա: Սահմանադրությունն ասում է, պետություն, եթե դու կցանկանաս մարդու իրավունքներն ու ազատությունները սահմանափակել, ապա քեզ համար խաղի կանոն եմ տալիս: Դա կարող ես անել, եթե այդ սահմանափակման համար ընտրված միջոցները պիտանի են և անհրաժեշտ Սահմանադրությամբ սահմանված նպատակին հասնելու համար:

Հիմա միասին փորձենք վերլուծել արդյոք համաչափության սկզբունքը պահպանված է:

Հարկադրանքով պատվաստողների թիմը մեզ ասում են պատվաստելու ենք ձեզ 2 պատճառով՝ 1) հանրության առողջությունը պաշտպանենք, 2) պատվաստված մարդը ավելի թեթև է տանում վիրուսը: Կարծես թե առաջին հայացքից վատ բան չեն ասում:

1) Հանրային Առողջության մասով ուշադրություն պետք է դարձնենք, որ պատվաստանյութերը չեն ապահովում մարդուն վարակվելուց: Սա անվիճելի է: Պատվաստվածներն էլ են դիմակ կրում, քանի որ կարող են վարակվել և վարակել: Սա արդեն նշանակում է, որ հարկադրանքով պատվաստվելը չի լուծում հանրային առողջության պահպանման խնդիրը: Այսինքն այդ միջոցները չեն ծառայում հանրության առողջության պահպանման նպատակին:

2) Պատվաստված մարդը թեթև է տանում վարակը: Նախ այս թեզը դեռ ապացուցված չէ: Մենք դեպքեր գիտենք, որ պատվաստված մարդիկ մահացել են: Բայց նույնիսկ եթե ապացուցվի, որ պատվաստված մարդը թեթև է տանում վարակը, միևնույն է, սա արդեն վերաբերում է մարդու անձնական տիրույթին և ոչ թե՝ հանրային: «Բնակչության բժշկական օգնության և սպասարկման մասին» օրենքի 25-րդ հոդվածի համաձայն՝ յուրաքանչյուր ոք իրավունք ունի գրավոր հրաժարվելու բժշկական միջամտությունից կամ պահանջելու ընդհատել այն:

Հարց է ծագում, այս դեպքում ինչու եք ուզում ստիպել մեզ: Հարկադրանքի գործընթացը ոտքից գլուխ հակասահմանադրական է: Մի փորձեք ստիպել մարդկանց:

Պատվաստվել, թե՝ ոչ: Սա յուրաքանչյուր մարդու գիտակցված որոշումը պետք է լինի: Տվեք մարդկանց օբյեկտիվ տեղեկատվություն, թող իրենք որոշեն: