Վերահսկիչ պալատի տարեկան զեկույցում լուրջ խախտումներ են արձանագրվել կրթության և գիտության, սոցիալական ապահովման ոլորտներում

ՀՀ Վերահսկիչ պալատը հրապարակել է 2016 թվականի տարեկան զեկույցը:

Զեկույցում մի շարք խախտումներ ու չարաշահումներ են գրանցվել հիմնականում կրթության և գիտության ոլորտում:

Ինչպես նշվում է զեկույցում, ավելի քան 21 մլն դրամի չարաշահում է արձանագրվել հիմնականում «Կրթական ծրագրերի կենտրոն» պետական հիմնարկի կողմից:

«ԾԻԳ-ի և «Բեյքեր Թիլլի Արմենիա» ՓԲԸ-ի միջև 2015 թվականի նոյեմբերին կնքվել է 70,235.3 հազ.դրամի պայմանագիր: Նախորդ վարկային ծրագրի շրջանակներում նույն հետազոտության իրականացման համար 2011 թվականին կնքված պայմանագրի գինը կազմել է 48,960.3 հազ.դրամ, որի առաջին փուլի վճարումը կազմել է 9,723.3 հազ.դրամ (առաջին փուլում կատարվել են ուսումնասիրության մեթոդոլոգիայի, հարցաթերթիկների, հարցման գործիքների մշակում և այլն): Գործող պայմանագրի տեխնիկական առաջադրանքը նույնն է, ինչ նախորդինը: 2015-2019 թվականների համար պայմանագրի կնքման նպատակով ՓԲԸ-ի կողմից ներկայացված ֆինանսական առաջարկով նախատեսվել և ԾԻԳ-ի կողմից ընդունվել են չհիմնավորված փոխհատուցվող ծախսեր և աշխատավարձ, որը նախորդ պայմանագրի ֆինանսական առաջարկով ներկայացված միևնույն աշխատանքների համար նախատեսված ծախսերից 21,269.0 հազ.դրամով (ներառյալ հարկերը) ավելի է: 2015 թվականին կնքված պայմանագրի գինը կարող էր նվազել ինչպես 2011 թվականի պայմանագրի շրջանակներում արդեն կատարված աշխատանքների համար առաջին փուլում վճարված 9,723.3 հազ.դրամի, այնպես էլ` չհիմնավորված 21,269.0 հազ.դրամի չափով: Հաշվի առնելով վերը նշվածը, պայմանագրի գինը կկազմեր շուրջ 40,000.0 հազ.դրամ: Կնքված պայմանագրի գինը (70,235.3 հազ.դրամ) հիմնավորված չէ», - ասվում է զեկույցում:

Խախտումներ են արձանագրվել նաև սոցիալական ծառայության տարածքային գործակալություններում. «Արձանագրվել է «Պետական նպաստների մասին» ՀՀ օրենքի և ՀՀ կառավարության 30.01.2014թ. «Պետական նպաստների մասին» ՀՀ օրենքի կիրարկումն ապահովելու մասին՛՛ թիվ 145-ն որոշման մի շարք դրույթների խախտումներ: Ընդհանուր առմամբ Սյունիքի, Վայոց Ձորի, Շիրակի, Գեղարքունիքի և Տավուշի մարզպետարանների ենթակայության թվով 20 Սոցիալական աջակցության տարածքային գործակալությունների (այսուհետ` ՍԱՏԳ) և Ջերմուկի քաղաքային համայնքի ենթակայության Ջերմուկի Սոցիալական աջակցության տարածքային բաժնի (այսուհետ` ՍԱՏԲ) վերահսկողության արդյունքում հայտնաբերվել են 539 դեպքով 63,618.0 հազ. դրամ գումարի չափով տարբեր բնույթի խախտումներ»:

Խախտումներ են գրանցվել նաև առողջապահության, սոցիալական ապահովության և այլ ոլորտներում:

Zham.am