Ողբերգական հետևանքներ կունենա. Դատավորներին պատժում են դատական ակտերը պատճառաբանելու համար. Փաստաբան Շխիմյան

Բազմաթիվ երկրների փորձն ուսումնասիրվել է, բոլոր երկրներում դատավորները ենթարկվում էին կարգապահական պատասխանատվության իրենց դատական ակտերը չպատճառաբանելու համար, մինչդեռ սույն դեպքում ստեղծվել է տարօրինակ իրավիճակ, երբ դատավորին պատասխանատվության են ենթարկել՝ դատական ակտը պատճառաբանելու համար։ Այս մասին «Փաստինֆո»-ի հետ զրույցում հայտնեց դատավոր Վարդան Գրիգորյանի ներկայացուցիչ, փաստաբան Միքայել Շխիմյանը։

Ինչպես արդեն տեղեկացրել ենք՝ ԲԴԽ-ն -բավարարել է դատավոր Վարդան Գրիգորյանին կարգապահական պատասխանատվության ենթարկելու արդարադատության նախարարի միջնորդությունը՝ դատավորին նկատողություն հայտարարելով։ Դատավորին կարգապահական պատասխանատվության ենթարկելուն կողմ են քվեարկել ԲԴԽ գիտնական-անդամները, դատավոր-անդամներից երկուսը՝ Ստեփան Միքայելյանը և Անի Մխիթարյանը դեմ են եղել տույժի տեսակին, իսկ քրեական գործեր քննող դատավորներ Մեսրոպ Մակյանը և Սերգեյ Չիչոյանն ընդհանրապես դեմ են եղել դատավոր Վարդան Գրիգորյանին կարգապահական պատասխանատվության ենթարկելուն։

Փաստաբան Միքայել Շխիմյանը «Փաստինֆո»-ի հետ զրույցում ասաց, որ նշված դատավորները պրակտիկ դատավորներ են և բազմաթիվ անգամներ առերեսվում են հիմնավոր կասկածի պատճառաբանվածության շեմի խնդրին, որը որևէ իրավական ակտով նախատեսված չէ, մեկնաբանման հարց է։

«Պրակտիկ դատավորը, առճակատվելով նշված խնդրին, կայացրել է նման որոշում, իսկ ԲԴԽ գիտնական-անդամների մասով չեմ կարող մեկնաբանել»,- նշեց Շխիմյանը։

Դիտարկմանը, որ առանց հիմնավոր կասկածի շեմի հաղթահարման՝ անձին չեն կարող ազատությունից զրկել, ուստի ստացվում է իրավիճակ, որ կալանավորման որոշում կայացնելիս դատավորը պետք է որոշում կայացնելիս գնահատի հիմնավոր կասկածի շեմը, մյուս կողմից՝ դատավորին կարգապահական պատասխանատվության են ենթարկում, երբ շեմը հաղթահարված չէ՝ Շխիմյանն արձագանքեց՝ նշելով, որ որևէ շեմ նախատեսված չլինելու պայմաններում դատավորները ենթարկվում են կարգապահական պատասխանատվության՝ ինչ-որ ենթադրյալ շեմ անցնելու դեպքի հետ կապված, ինչն անթույլատրելի է։ Փաստաբանը մտահոգություն հայտնեց առ այն, որ նման որոշումները կարող են բացասական հետևանքներ ունենալ նմանատիպ գործերով, մասնավորապես, փաստաբանը կարծում է, որ սա իր մեջ քողարկված ազդակ է պարունակում մյուս դատավորների համար, որոնցից գուցե կլինեն դատավորներ, որոնք այս որոշման ազդեցության ներքո կարող են նույնիսկ չանդրադառնալ հիմնավոր կասկածի հարցի քննարկմանը, ինչը ողբերգական հետևանքներ կունենա։

Ըստ Շխիմյանի՝ դատավորների նկատմամբ նմանատիպ վարույթների նախաձեռնումը ոչ այլ ինչ է, քան միջամտություն՝ դատավորի անկախությանը։

Հիշեցնենք, որ ՀՀ արդարադատության նախարարի պաշտոնակատար Ռուստամ Բադասյանի կողմից Երևանի ընդհանուր իրավասության դատարանի դատավոր Վարդան Գրիգորյանի նկատմամբ կարգապահական վարույթ է հարուցվել՝ ՀՀ գլխավոր դատախազ Արթուր Դավթյանի կողմից ներկայացված հաղորդման հիման վրա։ ՀՀ արդարադատության նախարարի պաշտոնակատարի կողմից 2021թ մայիսի 4-ին միջնորդություն է ներկայացվել ԲԴԽ՝ դատավորին կարգապահական պատասխանատվության ենթարկելու մասին։

Դատավորի նկատմամբ կարգապահական վարույթի հարուցման հիմք է հանդիսացել նախաքննության փուլում գտնվող քրեական գործերից մեկով կայացված դատական ակտը, որով դատավորը մերժել էր անձի նկատմամբ կալանավորումը որպես խափանման միջոց ընտրելու միջնորդությունը՝ հիմնավոր կասկածի բացակայության հիմքով։ Արդարադատության նախարարությունը գտնում է, թե, իբր, այդպիսով դատարանը գնահատական է տվել մեղադրանքին։

ՀՀ բարձրագույն դատական խորհուրդը՝ Գագիկ Ջհանգիրյանի նախագահությամբ, բավարարել է Ռուստամ Բադասյանի կողմից ներկայացված միջնորդությունը՝ դատավոր Վարդան Գրիգորյանին կարգապահական պատասխանատվության ենթարկելու մասին՝ նկատողություն հայտարարելով։