Ո՞ր արժանիքի համար են Արտեմ Ասատրյանին վերանշանակելու

«Ժողովուրդ» թերթը գրում է. «Թեև կառավարության կազմը գրեթե ամբողջովին պատրաստ է, սակայն Սերժ Սարգսյանը դեռ չի նշանակել ՀՀ աշխատանքի և սոցիալական հարցերի նախարարին: ՀՀԿ-ականները, իհարկե, պնդում են, որ Արտեմ Ասատրյանը շարունակելու է պաշտոնավարել և նշանակման մասին հրամանագիրն առաջիկայում կհրապարակվի:

Քանի որ Արտեմ Ասատրյանի ղեկավարած նախարարությունում պարբերաբար կոռուպցիոն սկանդալներ բացահայտվեցին, «Ժողովուրդ»-ը ԱԺ ՀՀԿ խմբակցության ղեկավար Վահրամ Բաղդասարյանից հետաքրքրվեց՝ ո՞ր արժանիքի համար են Ասատրյանին վերանշանակելու:

«Մամուլում բարձրաձայնված սկանդալները հիմք չեք ընդունի: Իրավապահ մարմինները երբ որ դրանց հիմնավոր պատասխան կտան, հիմքեր համարեք դրանք»,- ասաց նա: Մեր հարցին, թե կոռուպցիոն սկանդալների վերաբերյալ ձերբակալություններ ևս եղել են, Բաղդասարյանն ասաց. «Արտեմ Ասատրյանի աշխատանքից մենք գոհ ենք, նա աշխատում է բարձր հնարավորություններով, և ապագան ցույց կտա նրա աշխատանքի արդյունքները»:

Մանրամասները՝ թերթի այսօրվա համարում