Եթե լոգիկան այն է, թե Ռ. Քոչարյանը պատվիրել է, ապա գործել ենք մշտապես այդպես, և Ն. Փաշինյանի գրանցած բարձր ցուցանիշները 2,5 տարվա ընթացքում եղել են նույն ձևաչափով․ Ա. Նավասարդյան

Այսօր կայացած մամուլի ասուլիսում «GALLUP International Association» հայաստանյան ներկայացուցչության տնօրեն Արամ Նավասարդյանը ներկայացրեց հետընտրական հետազոտությունների արդյունքները։ Անդրադառնալով ընտրության օրը տարբեր ընտրատեղամասերում եղած հոսանքազրկումներին ու հարցին՝ արդյո՞ք իրենց կարծիքով դրանք ազդել են ընտրությունների արդյունքների վրա, Նավասարդյանը նշեց, թե չի կարող ասել՝ ընտրությունները կեղծվե՞լ են, թե՞ ոչ, դա կանեն ընդդիմադիր ուժերը, վերահսկող մարմինները, և իշխանությունը պետք է ապահովեր արդար ընթացքը։ Հաղորդում է Tert.am-ը:

«Մեր այսօրվա հրապարակած ցուցանիշից, համաձայն որի՝ «Քաղաքացիական պայմանագիր»-ի օգտին քվեարկել է հարցվածների 35,8 տոկոսը, մոտ 20 տոկոսով տարբերվում է արձանագրված արդյունքներից։ Մենք չենք կարող 24-25 ցուցանիշում լինել շատ թե քիչ ճիշտ, և երկու անգամ սխալվել իշխող ուժի ցուցանիշի մեջ, բացատրության բեռը մեր կազմակերպության վրա դրված չէ, դրված է իշխող ուժի և պատկան մարմինների վրա, թե ինչպես են արձանագրել այդ ցուցանիշը»,-նշեց նա։

Նավասարդյանի խոսքով՝ վերջին մեկ շաբաթում հիմնականում իշխող ուժի կողմից իրենց կողմից հրապարակված ցուցանիշները փորձում են ներկայացնել կեղծ: Նա նշել, թե իրենք կեղծ հարցումներ են անում, ոչ արդար պատկեր են ներկայացնում։

Ինչ վերաբերում է այն քննարկումներին, թե «GALLUP International Association»-ը «Հայաստան» դաշինքի առաջնորդ Ռոբերտ Քոչարյանի ու նրա թիմի պատվերով է «Հայաստան» դաշինքի բարձր ռեյտինգի վերաբերյալ տվյալներ հրապարակել նախընտրական շրջանում, Նավասարդյանն ասաց․ «Եթե այդ լոգիկան է, թե Ռոբերտ Քոչարյանը պատվիրել է, ապա մենք գործել ենք մշտապես այդպես, և Նիկոլ Փաշինյանի և իր թիմի գրանցած բարձր ցուցանիշները 2,5 տարվա ընթացքում եղել են նույն ձևաչափով»։

Անդրադառնալով վարչապետի պաշտոնակատարի խորհրդական Արայիկ Հարությունյանի հայտարարություններին, թե «Գելլափ»-ը կեղծ տվյալներ է հրապարակում, Նավասարդյանն ասաց, թե իր կարծիքով՝ Հարությունյանը պետք է կենտրոնանար իր աշխատանքի վրա, երբ 4 ոլորտ «այլասերեց», և ստիպված եղան նրան հեռացնել, որ «չպախարակի ամբողջ կուսակցությանը»։

Նավասարդյանը ներկայացրեց նաև որոշ տեսանյութեր, որ իրենց՝ նախկինում արված հարցումներից հետո, երբ իշխող ուժի ու Նիկոլ Փաշինյանի վարկանիշները բարձր են եղել, այդ ժամանակ իշխող ուժի կողմից «Գելլափ»-ին չեն քննադատել կեղծ տվյալներ հրապարակելու մեջ։

Tert.am