Ձերբակալվածների հեռախոսներում եղել են «Դոն Պիպոյի» և «Վստրեչի Ապերի» լուսանկարները. նոր մանրամասներ ծրագրված մահափորձից

«Ժողովուրդ»-ը գրում է. «Երևանում քրեական երկու հեղինակությունների նկատմամբ ծրագրված մահափորձի վերաբերյալ «Ժողովուրդ» օրաթերթին երեկ ուշագրավ մանրամասներ են հայտնի դաձել: Ինչպես հայտնի է՝ մահափորձ է ծրագրված եղել իրականացնել Արթուր Ասատրյանի՝ Դոն Պիպոյի և Արամ Վարդանյանի՝ Վստրեչի Ապերի նկատմամբ: Սակայն այս մահափորձը կանխել են իրավապահները. ոստիկանությունը բացահայտել ու ձերբակալել է հանցավոր խմբավորմանը: Ձերբակալվածները խոստովանել են, թե ովքեր են եղել իրենց թիրախում:

«Ժողովուրդ» օրաթերթին տեղեկություններ հասան, որ նրանց պատկանող հեռախոսների մեջ են եղել Արթուր Ասատրյանի՝ Դոն Պիպոյի և Արամ Վարդանյանի լուսանկարները, ինչը, ըստ էության, առավել հիմնավոր է դարձրել այն տեղեկությունները, որ վերոնշյալ անձանց նկատմամբ մահափորձ է ծրագրված եղել իրականացնել: Նաև պարզեցինք, որ ձերբակալված անձինք Վանաձոր քաղաքի բնակիչներ են, թե ովքեր են նրանք, իրավապահներն առայժմ գաղտնի են պահում:

Մեզ լուրեր հասան նաև, որ իրավապահ համակարգը երեկվա դրությամբ խիստ հսկողություն է իրականացնում նաև ձերբակալված անձանց մտերիմների անվտանգությունը ապահովելու համար, որ հետագայում բանը չհասնի վրեժխնդրության»,-գրում է թերթը:

Մանրամասները՝ թերթի այսօրվա համարում: