Անհրաժեշտ է երկրի ընդհանուր միջավայրը փոխել, որովհետև մեզ մոտ նյարդային մթնոլորտ է տիրում. Ռոբերտ Քոչարյան. Տեսանյութ

Անհրաժեշտ է երկրի ընդհանուր միջավայրը փոխել, որովհետև մեզ մոտ նյարդային մթնոլորտ է տիրում: Այս մասին այսօր՝ մայիսի 30-ին, Արարատի մարզի բնակիչների հետ հանդիպման ժամանակ հայտարարել է ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը։

«Անհրաժեշտ է երկրի ընդհանուր միջավայրը փոխել, որովհետև մեզ մոտ նյարդային մթնոլորտ է տիրում։ Պետք է փորձենք հանգստություն բերել մեր հասարակությանը։ Վերջերս Մոսկվայում ինձ գիրք են նվիրել, դեռ չեմ հասցրել կարդալ, բայց վերնագրին նայեցի՝ «Нервные государства»։ Առաջին ցանկությունս էր վերնագրի տակ գրել՝ Հայաստան, որովհետև Հայաստանն այսօր հենց այդ վիճակում է, և սա լավ վիճակ չէ։ Մենք այսօր մասնակցում ենք ընտրություններին, որ երկիրը հանենք այս վիճակից, որովհետև նման իրավիճակում մարդ դառնում է իռացիոնալ, սկսում է չընկալել և չընդունել տրամաբանական բաներ։ Պետք է հանգստություն բերենք։ Մարդկանց գլուխներում շփոթություն է առաջանում, որն ամեն քաղաքացի չի կարող հաղթահարել։ Այս ներվայնությունը գալիս է վերևից՝ երկրի ղեկավարությունից»,- ասել է Ռոբերտ Քոչարյանը` պատասխանելով հանրության հոգեբանական վիճակին վերաբերող հարցին։

Քոչարյանի խոսքով` մեր երկրում կառավարման ճգնաժամ է այս պահին:

Նա նաեւ ասել է, որ պետք է դադարեցնել այն կազմակերպությունների աշխատանքը, որոնք քայքայում են մեր ազգային ինքնությունը:

Պատասխանելով քաղաքացու պարգեւավճարների մասին հարցին, Քոչարյանն ասաց, որ անկախ ամեն ինչից մեր երկրում միայն մեկ խնդիր է լուծվում` ժամանակին պարգեւավճարներ են տալիս, որը նորմալ չէ:

Աղբյուր՝ NEWS.am