Սյունիքի համայնքապետերը ստիպված կամավորական ջոկատներ են ձևավորում, քանի որ բանակի կողմից հուսալի պաշտպանություն չեն տեսնում. Մխիթար Զաքարյան. Տեսանյութ
Մեղրիի տարածաշրջանում, շնորհիվ ՌԴ սահմանապահ զորքերի զգալի ներկայության, իրավիճակը հանգիստ է՝ համեմատած Սյունիքի մյուս համայնքների սահմանային իրավիճակի հետ, թշնամին այս ուղղությամբ որևէ առաջխաղացում չունի. կարծես մեր հանրությունը համակերպվել է ինչպես Արցախի, այնպես էլ Սև լճի կորստի հետ, իշխանության շարքերում նույնիսկ այդ զավթումը խրախուսողներ կան: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել Մեղրիի համայնքապետ, «Վերածնվող Հայաստան» կուսակցության վարչության անդամ Մխիթար Զաքարյանը:
«Ոչ միայն Սև լճի դրվագում, այլև վերջին երեք տարում տեսնում ենք կանոնավոր բանակից անցում ֆիդայական, ջոկատային, կուսակցական ձևաչափերի, սա տանում է պարտության, քայքայման և կոլապսի: Երկրի պաշտպանությունը, սահմանների պահպանությունը պետք է իրականացնեն կանոնավոր Զինված ուժերը, այլ կառույցների մասնակցությունը պետք է սահմանափակվի: Ցավոք, համայնքապետերը, տեսնելով բանակի բացակայությունը, ստանձնում են պաշտպանության գործը, մինչդեռ նրանք պետք է զբաղվեն տեղական ինքնակառավարմամբ»,-ասել է սյունեցի գործիչը:
Ըստ Զաքարյանի՝ ինչպես այլընտրանքային հարկային տեսչություն չի կարող լինել, այդպես էլ բանակին զուգահեռաբար ձևավորվող կամավորական ջոկատներ չպետք է լինեն. «Սահմանների պաշտպանությունն ամբողջությամբ պետք է իրականացվի ԳՇ-ի կողմից: Եթե համայնքապետերը հուսալի պաշտպանություն տեսնեին, չէին խառնվի բանակի գործերին: Անթույլատրելի է Մեղրիի կամ Սիսիանի միջանցքի մասին նույնիսկ խոսելը, դա թշնամու ձևակերպումն է և նշանակում է՝ մեր սուվերեն տարածքից հողակտոր նվիրել թշնամուն: Եթե խոսքը կոմունիկացիաների բացմանն է վերաբերում, այնպես, ինչպես իրանական մեքենաներն են ՀՀ-ով գնում Վրաստան, դա կարելի է քննարկել, թեև այսքան զոհերի և գերիների պարագայում անգամ այդ հարցի քննարկումն արդարացված չէ»:
Մեղրիի համայնքապետի կարծիքով՝ թշնամին իրավունք չպետք է ունենա մեր տարածքում իր օրենքներով երթևեկելու, քանի որ մեր հայրենիքի տարածքը պետք է փոխանցենք մեր սերունդներին. «Եթե անգամ ՀՀ բնակչությունը համաձայն լինի որևէ հողակտոր զիջելուն, դարձյալ չի կարելի դա անել, քանի որ այն մեր երեխաներինն է: Անթույլատրելի է առանց քննարկման, գաղտնի, բանավոր պայմանավորվածությամբ հող տալ, հանրությունն էլ իներտ է արձագանքում: ՌԴ սահմանապահների ներկայությունը մեր բնակչությանը հոգեբանորեն վստահություն է ներշնչում, սա թերևս ժամանակավոր էֆեկտ է, մենք պետք է լրջորեն մտածենք սեփական ԶՈւ-ն զարգացնելու մասին»:
«Վերածնվող Հայաստան» կուսակցության ներկայացուցչի պնդմամբ՝ ՌԴ-ն ուզում է տեսնել ուժեղ ու մարտունակ դաշնակցի, և մենք պետք է փորձենք դառնալ այդպիսին: «Դիրքային աշխատանքները թերի են: Եթե երկրի գերագույն գլխավոր հրամանատարը և մյուս ղեկավարները որևէ առնչություն չեն ունեցել զինծառայության հետ, բանակն ինքնին չի կարող արդյունավետ լինել, պետք է հասկանալ այդ գործից՝ գոնե չմիջամտել, չվնասել բանակին»,-ամփոփել է Մխիթար Զաքարյանը:
Աղբյուրը՝ tert.am
Հետևեք մեզ Facebook-ում