Ամերիկացի կոնգրեսական Դեյվիդ Վալադաոն կոչ է անում դադարեցնել ԱՄՆ-ի կողմից Ադրբեջանին տրվող աջակցությունը

Ամերիկացի կոնգրեսական Դեյվիդ Վալադաոն ջանքեր է գործադրում, որպեսզի ԱՄՆ-ն սառեցնի Ադրբեջանին հատկացվող ռազմական աջակցությունը և ապագայում էլ արգելափակի ցանկացած օգնություն, որը կարող է նպաստել Ադրբեջանի ռազմական գործողությունների իրականացմանը։ 

ԱՄՆ պետքարտուղար Էնթոնի Բլինքենին ուղղված նամակում Դեյվիդ Վալադաոն և մի քանի այլ կոնգրեսականներ իրենց մտահոգությունն են հայտնել ապրիլի 26-ին կայացրած որոշման հետ կապված, որով հրաժարվում են «Ազատության աջակցության ակտի» 907-րդ բաժնի կատարումից, այն է՝ ԱՄՆ-ի կողմից Ադրբեջանին օգնության երկարատև օրենսդրական սահմանափակումներից։

«Այս գործողությունը հատկապես մտահոգիչ է Արցախի հայ ժողովրդի նկատմամբ Բաքվի իրականացրած ռազմական գործողություններից, ինչպես նաև հայ ռազմագերիներին ազատ արձակման գործընթացը ձգձգելուց հետո»,-նշված է նամակում։

ԱՄՆ կոնգրեսականը կոչ է արել կասեցնել ԱՄՆ-ի կողմից Ադրբեջանին հատկացվող ռազմական օժանդակությունը։ Դեյվիդ Վալադաոն ընդգծել է, որ վերջին տարիներին Ադրբեջանին տրամադրված ավելի քան 100 միլիոն դոլարը, որը հավաքագրվել է ամերիկացի հարկատուներից, Բաքվին հնարավորություն է տվել զարգացնել ռազմական կարողությունները, և այդ ռեսուրսներն ուղղվել են Արցախի և Հայաստանի դեմ ռազմական գործողություններին։

Աղբյուր` Փաստինֆո