Հեղափոխության սպառնալիքով կամ բուն հեղափոխությամբ պետք է վերցնել իշխանությունը, եթե Փաշինյանը դիմի վարչական ռեսուրսի կիրառման. Արգիշտի Կիվիրյան. Տեսանյութ

Նիկոլ Փաշինյանը շատ լավ գիտակցում է, որ այլևս Հայաստանում ունի լեգիտիմության լրջագույն խնդիր, գիտակցում է նաև, որ լրջագույն խնդիր ունեցող երկրի ղեկավարի հետ որևէ այլ պետության ղեկավար առանձնապես ցանկություն չունի համաձայնագրեր ստորագրել, ճանապարհների ապաշրջափակելու վերաբերյալ փաստաթղթերի տակ ստորագրություններ դնել, ուստի, հրաժարական տալով, Փաշինյանը երկրը տանում է արտահերթ խորհրդարանական ընտրությունների՝ ինչպես աշխարհաքաղաքական կենտոնների, այնպես էլ Հայաստանի ներսում իրեն անընդհատ հանդիպող ճնշումների պատճառով։ 168 TV-ի «Ռեվյու» հաղորդաշարի եթերում՝ անդրադառնալով Փաշինյանի սցենարով արտահերթ խորհրդարանական ընտրությունների գնալու ԱԺ երեք խմբակցությունների համաձայնությանը, ասաց վերլուծաբան Արգիշտի Կիվիրյանը։

«Փաշինյանի նախաձեռնությամբ տեղի է ունեցել իր և Պուտինի հեռախոսազրույցը, որի ընթացքում, ըստ Կրեմլի տարածած պաշտոնական հաղոդրագրության, Փաշինյանը տեղեկացրել է արտահերթ ընտրությունների հետ կապված ներքաղաքական զարգացումների մասին։ Այսինքն՝ մինչև իր հրաժարականը՝ Կրեմլն ասել է Փաշինյանին՝ ստանձնել ես պարտավորություն, դե գնա արտահերթ խորհրդարանական ընտրությունների»,- ասաց Կիվիրյանը։

Աշխարհաքաղաքական կոնսենսուսից բացի, խորհրդարանական ընդդիմադիր խմբակցությունների հետ Փաշինյանի ձեռք բերած կոնսենսուսը Կիվիրյանը համարեց քաղաքական առևտրի հետևանք, քանի որ, ըստ նրա, խորհրդարանում գտնվող երկու ուժերը, ինչպես եղել են Փաշինյանին սպասարկող ուժեր, այդպես էլ շարունակել են նույն գործելաոճը։

«Ընդդիմության մոտ չկա իշխանություն վերցնելու ծրագիր, իրենք, այո՛, ասում են, բայց դա պետք է իրական գործողություններով ցույց տալ, այնինչ նրանք իրական գործողություններով ցույց են տվել Փաշինյանի հետ այս կամ այն համաձայնությունների կայացումը։ Օրինակ, մեկը Էդմոն Մարուքյանն է՝ իր թիմով, որը փաստացի սպասարկել է մի կողմից՝ Փաշինյանին, մյուս կողմից՝ մինչև 2018 թվականը եղած իշխանությանը, իսկ իշխանափոխությունից հետո էլ սպասարկել է այս իշխանությանը։ Մյուս ուժը հեղափոխականներին կենարար ջուր հասցրած «Բարգավաճ Հայաստան» խմբակցությունն է։ ԲՀԿ-ի և ԼՀԿ-ի նպատակն է հիմա մնալ բեմում և սպասարկել նրան, որն այդ պահին կունենա ուժ. եթե ուժ ունի Նիկոլ Փաշինյանը՝ կսպասարկեն նրան, եթե ուժ ներկայացնի այլ մեկը, ապա նույնը կանեն այդ այլ մեկի համար։ Այս ուժերը չեն կարող լինել ընդդիմություն»,- ասաց Կիվիրյանը՝ նշելով, որ Հայաստանում 2020 թվականի նոյեմբերի 9-ից հետո բացակայում էր ռեալ ընդդիմությունը՝ դրանով պայմանավորված էլ 17 կուսակցություններն իրենց ձևաչափով, ըստ էության, հաջողության չհասան։

Ա․ Կիվիրյանի փոխանցմամբ՝ հիմա, սակայն, ժամանակն է, որ գոնե արտահերթ ընտրություններից առաջ ձևավորվեն այդ ռեալ քաղաքական ընդդիմադիր ուժերը, որպեսզի հնարավոր լինի կանխել Փաշինյանի իշխանության վերարտադրությունը, որին հասնելու համար նա դիմելու է վարչական ռեսուրի տոտալ կիրառման։

«Նոր-նոր սկսում է ընտրական գործընթացը։ Եթե ընդդիմությունն իրապես ընդդիմություն է, ապա պետք է բռնի և ջարդի վարչական ռեսուրս կիրառողի ձեռքը։ Նոյեմբերի 10-ից հետո պատասխանատվությունն արդեն ընդդիմադիրների վրա է, և քանի որ 17-ի ձևաչափն իրեն արդեն սպառել է, իսկ սուրբ տեղը դատարկ չի մնում, սպառված ընդդիությունը դուրս է գալիս, տեղն ուրիշն է լրացնում, ապա նաև կատարվողի պատասխանատվությունը լինելու է այդ նոր ընդդիմությանը։ Հիմա ամեն մեկին տրված է աստղային ժամ. կա՛մ պետք է ռեալիզացնեն դա, կա՛մ՝ ոչ։ Նոր ընդդիմադիր ուժերին պետք է նայենք և հասկանանք, թե նրանք ինչի՞ են ընդունակ։ Այն թիմը, որը Փաշինյանին մարտահրավեր է նետում, պետք է լինի քաղաքական հեղափոխական թիմ, որ գործընթացը տանի այնպես, որ, եթե Փաշինյանը դիմի կեղծիքների և վարչական ռեսուրսի կիրառման, կա՛մ հեղափոխության սպառնալիքով, կա՛մ բուն հեղափոխությամբ պետք է վերցնի իշխանությունը։ Իսկ այս պարագայում ակնհայտ է, որ այդ հեղափոխությունը թավշյա չի լինելու»,- ասաց Կիվիրյանը։

Հարցազրույցի մանրամասները՝ տեսանյութում