Աշխարհի առաջնության Գավաթը Երևանում է (ֆոտոշարք, Տեսանյութ)

Ֆուտբոլի Աշխարհի գավաթը ժամանել է Հայաստան և ցուցադրվել Երևանում:

Գավաթի երևանյան շրջագայության համար կազմակերպված փակ միջոցառման ընթացքում այն ներկայացրել է Ֆրանսիայի հավաքականի կազմում 1998 թվականի աշխարհի չեմպիոն, «Ռեալի» նախկին ֆուտբոլիստ Քրիստիան Կարամբյոն:

«20 տարի առաջ ես նույնպես նվաճել եմ այս գավաթը Ֆրանսիայի ազգային հավաքականի իմ խաղընկերների հետ: Կարծում եմ՝ ձեզ հայտնի է, որ այն թիմում կային հայեր՝ Յուրի Ջորկաեֆն ու Ալեն Բոգոսյանը: Ես շատ հպարտ եմ ներկայացնել այս գավաթը»,- ասել է  Կարամբյոն:

Գավաթին դիպչելու իրավունք ունեն միայն աշխարհի առաջնության չեմպիոններն ու երկրների ղեկավարները: Գավաթի երեւանյան այցելության շրջանակում կազմակերպված փակ միջոցառման ժամանակ Հայաստանի նախագահը գավաթը կընդունի Քրիստիան Կարամբյոյից։

Աշխարհի առաջնության գավաթի չորրորդ շրջագայության պաշտոնական մեկնարկը տրվել էր 2017-ի սեպտեմբերին Ռուսաստանում: Մինչեւ մայիս ամիսը այն կլինի 91 քաղաքներում՝ անցնելով ավելի քան 126 000 կմ:

Աշխարհի առաջնության գավաթի շրջագայության հովանավորն է «Կոկա Կոլա» ընկերությունը։

Մանրամասները՝ Zham.am-ի տեսանյութում: