Armat Media-ում իրականացրած գործողություններն ապօրինի են, խախտվել են աշխատակիցների իրավունքները. Փաստաբան

«Դատարանի որոշմամբ  արձանագրված չի եղել, որ պետք է առգրավեն, օրինակ, այստեղ թվով ութ-ինը աշխատակիցների հեռախոսները, ինչով խախտվել է վերջիններիս նամակագրության, անձնական կյանքի իրավունքը՝ սահմանադրությամբ երաշխավորված»,-լրագրողների հետ զրույցում ասաց փաստաբան Լիանա Գասպարյանը՝ խմբագրությունում կատարվող գործողությունները որակելով ապօրինի։

 Armat Media-ի խմբագրությունում իրականացվող խուզարկությունների ընթացքում իրավապահները, ըստ փաստաբանի, առգրավել են շուրջ 9  բջջային հեռախոս, որոնցից միայն մեկն է պատկանել կամ օգտագործվել խմբագրության աշխատակիցների կողմից։ Մնացած սարքերը, նրա խոսքով, որևէ առնչություն չեն ունեցել լրատվամիջոցի գործունեության հետ։

Լիանա Գասպարյանի խոսքով՝ խուզարկության ընթացքում արձանագրվել են նաև փաստաբանի գործունեությանը խոչընդոտելու փորձեր։ Նա պատմեց, երբ անհրաժեշտ է եղել մի սենյակից տեղափոխվել մյուսը՝ մասնակցելու հաջորդ քննչական գործողությանը, ներկաներից մեկը փորձել է խոչընդոտել այդ գործընթացը։

«Ես հարգում եմ իմ մասնագիտությունը՝ փաստաբանի, և թույլ չեմ տա, որ որևէ մեկը խոչընդոտի իմ մասնագիտական գործունեությանը, և այդ անհետևանք չի մնալու», — նշեց նա։

Գասպարյանը շեշտեց, որ պաշտպանական կողմը պատրաստվում է բողոքարկել թե՛ խուզարկության մասին դատարանի որոշումը, թե՛ դրա շրջանակում իրականացված գործողությունները։

Նրա պնդմամբ՝ աշխատակիցները պատրաստակամություն են հայտնել տրամադրել իրենց հեռախոսները զննության համար, ներառյալ գաղտնաբառերը, սակայն խնդրել են զննությունից հետո վերադարձնել դրանք։

«Աշխատակիցները չեն հրաժարվում տրամադրել հեռախոսները, այդ թվում՝ հեռախոսի գաղտնաբառերը, խնդրելով, որ իրենց անձնական կյանքի և այլ անհրաժեշտ տեղեկություններ կան այդ հեռախոսում։ Չենք առարկում, որպեսզի հեռախոսը զննեք, վերադարձնեք մեզ», — ասաց նա։

Ըստ փաստաբանի՝ իրավապահները տեղում  նույնիսկ չեն իրականացրել սարքերի զննություն։

«Այս պայմաններում անգամ հեռախոսը չեն զննում, պատճառը այն է, որ շտապում են այլ գործողություններ կատարելու», - նշեց նա։

Խուզարկություններն իրականացվում են Ալիկ Ալեքսանյանին առնչվող քրեական վարույթի շրջանակում։ Փաստաբանի խոսքով՝ հենց այդ գործն է դատարանի որոշման հիմքում։

Նա հիշեցրեց, որ մի քանի օր առաջ Ալեքսանյանին մեղադրվել էր փողերի լվացման և անձանց նյութական շահագրգռմամբ հավաքների ներգրավելու մեղադրանքներ, սակայն, նրա պնդմամբ, այդ պահին առկա էին միայն օպերատիվ տվյալներ։

«Զուտ օպերատիվ տվյալով Ալիկ Ալեքսանյանը այսօր գտնվում է անազատության մեջ։ Դատական ակտը, իհարկե, բողոքարկվել է։ Այս դատական ակտը՝ խուզարկություն կատարելու մասին որոշումը, ևս բողոքարկվելու է»,- ասաց փաստաբանը։

Նա նաև տեղեկացրեց, որ քննարկվում է խմբագրության տարածքների դռները կնիքելու հնարավորությունը, ինչը, ըստ նրա, կարող է խոչընդոտել լրատվամիջոցի աշխատանքը։

«Այդ կերպ փորձում են ամեն կերպ խոչընդոտել նաև ձեր գործընկերոջ՝ «Արմատ Մեդիա»-ի գործունեությունը»,- հայտարարեց նա։

Լիան Գասպարյանի խոսքով՝ առգրավվել են նաև տարբեր գրառումներ պարունակող փաստաթղթեր, տետրեր և այլ նյութեր, սակայն այս փուլում դեռևս պարզ չէ, թե ինչ հնարավոր ապացույցներ են որոնում քննիչները։

«Մենք ևս այս կարգավիճակում ոչինչ չենք կարող ասել, միայն կարող ենք արձանագրել, որ անձանց հեռախոսները վերցվել են, իսկ այդ հեռախոսները որևէ կապ չունեն «Արմատ Մեդիա»-ի հետ», -եզրափակեց նա։
Աղբյուրը` Panorama.am