ՀՀ ՍԴ դատավորները կսկսեն հավելավճար ստանալ աշխատանքային ստաժի համար. նոր օրենսդրական նախաձեռնություն

ՀՀ Սահմանադրական դատարանի դատավորները պետք է հավելավճար ստանան աշխատանքային ստաժի համար։ Այս մասին մարտի 18-ին Ազգային ժողովի պետական-իրավական հարցերի մշտական հանձնաժողովի նիստում «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին օրենսդրական փաթեթի և հարակից օրենքներում փոփոխությունների քննարկման ժամանակ հայտարարել է արդարադատության նախարար Սրբուհի Գալյանը։

Նրա խոսքով՝ Հայաստանի Սահմանադրական դատարանի դատավորների աշխատավարձերի չափը չի համապատասխանում նրանց բարձր կարգավիճակին, լիազորություններին և պատասխանատվությանը։

«Այդիսկ պատճառով, անհրաժեշտություն է առաջացել վերանայել նրանց աշխատավարձերի կառուցվածքը»,- ասել է Գալյանը։ Այսպիսով, ըստ նախագծի, կվերանայվեն սոցիալական և նյութական անկախության լրացուցիչ երաշխիքները։ ՍԴ նախագահին, նրա տեղակալներին, ինչպես նաև Սահմանադրական դատարանի դատավորներին կվճարվի լրացուցիչ հավելավճար աշխատանքային ստաժի համար։ Մասնավորապես՝ հավելավճարը կավելանա 20%-ով՝ պաշտոնավարման երկրորդ տարվանից, և 35%-ով՝ երրորդ տարվանից։

«Իսկ չորս տարի անց վճարումներն ամեն տարի կաճեն 10%-ով»,- հայտնել է նախարարը: Հայաստանում դատավորներն ընտրվում են 12 տարի ժամկետով: Հետևաբար, ՍԴ դատավորների աշխատավարձը կբարձրանա 11 անգամ: Գալյանը նշել է, որ ներկայումս դատավորները պաշտոնավարման երկրորդ տարվանից հավելում են ստանում իրենց աշխատավարձի 20%-ի չափով: Իսկ օրենսդրական փոփոխությունների ընդունումից հետո նրանք կսկսեն ստանալ նաև հավելավճար՝ ստաժի համար:

Նախարարը, տեխնիկական պատճառներով, չի կարողացել ներկայացնել դատավորների աշխատավարձերի բարձրացման վերաբերյալ կոնկրետ թվեր՝ խոստանալով դա անել ավելի ուշ: Միևնույն ժամանակ, նրա խոսքով, փոփոխությունների ընդունումից հետո 4 տարի աշխատած ՍԴ դատավորը կստանա 400 հազար դրամով ավելի: Արդարադատության նախարարը միաժամանակ նշել է, որ ՍԴ բյուջեն չի բավարարի լրացուցիչ վճարումների ապահովման համար: Այնպես որ, լրացուցիչ միջոցների հատկացման անհրաժեշտություն կառաջանա՝ 46,8 միլիոն դրամի սահմաններում: Որոշ քննարկումներից հետո տվյալ օրենսդրական նախաձեռնությունը ստացել է ԱԺ մշտական հանձնաժողովի դրական եզրակացությունը: